Qytaı men Ózbekstan shekarasynda 4 jańa keden beketi iske qosyldy
ASTANA. KAZINFORM — Jańa nysandar halyqaralyq standarttarǵa saı salynǵan jáne kólik quraldaryn skanerleýge, tekserýge jáne avtomatty ólsheýge arnalǵan joǵary tehnologııalyq jabdyqtarmen jabdyqtalǵan, dep habarlaıdy Qarjy mınıstrligi.
Qarjy mınıstrligi Qytaı, Ózbekstan jáne Túrikmenstanmen shekaralas 9 ótkizý pýnktin jańǵyrtý jumystaryn júrgizip jatyr. Bul sharalar tranzıttik áleýetti arttyrýǵa baǵyttalǵan memlekettik saıasat aıasynda júzege asyrylyp keledi.
Joba aıasynda eskirgen ınfraqurylymdy tolyq aýystyra otyryp, zamanaýı jańa ótkizý pýnktteriniń qurylysy kózdelgen.
2025 jyldyń basynan 4 jańǵyrtylǵan ótkizý pýnkti iske qosyldy:
- Qytaımen shekarada — «Kóljat» jáne «Alakól»;
- Ózbekstanmen shekarada — «Qaplanbek» jáne «Atameken».
— Jyldyń sońyna deıin «Qazyǵurt», «Tájen», «Temir baba», «Maıqapshaǵaı» jáne «Baqty» bes ótkizý pýnktin jańǵyrtýdy aıaqtaý josparlanyp otyr. Jańa pýnktterde shekarany yńǵaıly jáne qaýipsiz kesip ótý úshin barlyq jaǵdaı jasalǵan. Kólik qozǵalysy jolaǵynyń sany 2-den 6-ǵa deıin ulǵaıtyldy, baqylaý júrgizýshiniń kabınasynan shyqpaı-aq ótedi, al protsesterdiń tolyq avtomattandyrylýynyń arqasynda shekaradan ótý ýaqyty orta eseppen 30 mınýtqa deıin qysqartyldy. Munyń ereksheligi — «bir tereze» qaǵıdaty boıynsha qosymsha toqtatýsyz baqylaýdyń barlyq túrinen úzdiksiz ótýdi qamtamasyz etetin biryńǵaı tehnologııalyq dáliz sanalady, — delingen mınıstrlik taratqan aqparatta.
Jalpy Qarjy mınıstrligi ótkizý pýnktterin jańǵyrtý, kedendik rásimderdi tsıfrlandyrý jáne avtomattandyrý, sondaı-aq shekara mańy servısin damytý jónindegi sharalar keshenin kezeń-kezeńimen iske asyryp jatyr.
Máselen, 2023 jyldan bastap EAEO syrtqy shekarasynyń barlyq avtomobıl ótkizý pýnktterinde «CarGoRuqsat» elektrondyq kezek júıesi engizildi. Bul respýblıkalyq mańyzy bar avtojoldarda avtokólik quraldarynyń naqty jınalýyn joıýǵa, tasymaldaý protsesiniń ashyqtyǵy men tıimdiligin arttyrýǵa múmkindik berdi.
76 bıznes-protsess ońtaılandyryldy, bul AKQ-nyń ótkizý pýnktteri arqyly ótýiniń ortasha ýaqytyn úsh esege qysqartty. 3 avtohab jáne 1 kólik-logıstıkalyq ortalyq iske qosyldy. «Nur Joly» ótkizý pýnkti táýlik boıy jumys rejımine aýystyryldy, «Alakól» jáne «Maıqapshaǵaı» ótkizý pýnktiniń jumys ýaqyty uzartyldy.
2024 jyldan bastap 20 modýlmen biryńǵaı tsıfrlyq platforma «Keden» júıesi engizilip jatyr, búgingi kúni onyń 13 modýli jumys isteýde. Deklaratsııalaýdyń, formatty-logıkalyq baqylaýdyń elektrondyq formaty engizildi, «Qorǵas» ShYHO-da taýarlardy esepke alý tolyq tsıfrlandyrylǵan. Integratsııalanǵan baqylaý qyzmetteri avtomattandyryldy, tranzıt rásimi jedeldetildi, jeke kabınet arqyly qashyqtyqtan ózara is-qımyl qamtamasyz etildi.
Ótkizý múmkindigi 2022 jyly 640 myń kólik quralynan 2024 jyly 1,4 mıllıonǵa deıin ósti. Jańǵyrtý ashyqtyqqa, taýar aǵynyn jedeldetýge, shekara mańy ekonomıkasyn damytýǵa baǵyttalǵan.
Buǵan deıin BQO-da «Syrym» avtomobıl ótkizý beketinde qurylys-montaj jumystary bastalatynyn jazǵan edik.