Qytaı men Ortalyq Azııadan Eýropaǵa jetkiziletin júktiń 80%-y Qazaqstannan ótedi - sarapshy
ASTANA. KAZINFORM – Kaspıı saıasat ortalyǵynyń dırektory Afgan Nıftıevtiń aıtýynsha, Eýropa elderi Qazaqstan arqyly tranzıt kólemin arttyrýǵa múddeli. Bul týraly ol «Astana Think Tank» halyqaralyq forýmynda málim etti.
«Óıtkeni Eýropa bizdiń mıneraldy resýrstarǵa muqtaj. Qazir qurlyq arasynda bıdaıdan bastap, sırek kezdesetin metaldarǵa deıin tasymaldanyp jatyr. Byltyr ózara taýar aınalymy 41 mlrd dollarǵa jetti. Alys-beristi odan ári arttyrý úshin jańa termınaldardy kóbeıtý kerek. Bul júk jetkizý merzimin qysqartyp, jańa naryqtarǵa jol ashady», - deıdi sarapshy.
Onyń pikirinshe, qazir Qytaı men Ortalyq Azııadan Eýropaǵa jetkiziletin júktiń 80 paıyzdan astamy Qazaqstan arqyly ótedi. Alda birneshe termınal salynbaqshy. Bul Qazaqstannyń logıstıkalyq áleýetin arttyryp, tranzıttik habqa aınalýyna múmkindik beredi.
Jalpy, forýmǵa alys-jaqyn shetelderden 45-ten astam sarapshy qatysty. Eki kúnge jalǵasatyn is-sharada halyqaralyq analıtıkalyq ortalyqtar birqatar memorandýmǵa qol qoımaq. Máselen, búgin Qazaqstan Strategııalyq zertteýler ınstıtýty men Irannyń bas sarapshy ortalyǵy kelisim jasady. Maqsat - saýda-ekonomıkalyq yqpaldastyqty keńeıtý máselelerin zerdeleý, qandaı jobalardy birlesip iske asyrý tıimdi bolatynyn baǵamdaý.
