Qytaı men Ortalyq Azııa elderiniń baılanysyn tereńdetetin medıajobalar jasalady
ASTANA. KAZINFORM — Qytaı Medıakorporatsııasynyń (CMG) prezıdenti jáne bas redaktory, Qytaı Kommýnıstik partııasy Ortalyq komıtetiniń úgit-nasıhat bólimi meńgerýshisiniń orynbasary Shen Haısıýn Ortalyq Azııa elderimen gýmanıtarlyq baılanys týraly pikirin bildirdi.
Onyń aıtýynsha, Uly Jibek joly — qos jaǵany jalǵaǵan ózen ispettes, onyń boıynda Qytaı men Ortalyq Azııa elderi arasynda san ǵasyrlyq dostyq pen ózara yqpaldastyq ornaǵan. Qytaı halqy búginde erekshe jaqsy kóretin anar, injir syndy jemister men mýzykalyq aspaptar, sonyń ishinde pıpa tarıhı kezeńderde dál osy Ortalyq Azııadan taraǵan.
— Tóraǵa Sı Tszınpın Qytaı men Ortalyq Azııa elderi arasyndaǵy qarym-qatynasqa úlken mán beredi. Ol Qytaıdyń Ortalyq Azııa elderiniń árdaıym senimdi kórshisi, seriktesi jáne dosy ekenin únemi atap ótedi. Birinshi Qytaı — Ortalyq Azııa sammıtinen keıin Tóraǵa Sı Tszınpın men Ortalyq Azııanyń bes eliniń kóshbasshylary 6 anar aǵashyn otyrǵyzdy. Bul — Qytaı men Ortalyq Azııa arasyndaǵy birlik pen yntymaqtastyqtyń belgisi. Búgin «Sı Tszınpınniń naqyl sózderi» atty baǵdarlamanyń halyqaralyq nusqasyn efırge shyǵarý — 6 eldiń kóshbasshylarynyń ortaq bastamasymen Qytaı men Ortalyq Azııa halyqtarynyń dostyǵyn nyǵaıtyp, mádenı almasýdy tereńdetýge baǵyttalǵan naqty qadam, — dedi Shen Haısıýn Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmynda.
Baǵdarlamada Sı Tszınpın keltirgen kóne qytaı jazbalary men halyq maqal-mátelderi iriktelip alynǵan. Onda ekologııa, mádenı murany saqtaý jáne zamanaýı órkendeý sekildi mańyzdy taqyryptar qamtylǵan. Bul joba Sı Tszınpınniń tereń adamı bolmysyn, kemeńgerlik kózqarasyn aıqyn kórsetedi jáne Qytaı men Ortalyq Azııa arasyndaǵy ortaq múdde men berik áriptestikke rýhanı serpin beredi.
— Qytaı Medıa korporatsııasy Qytaı men Ortalyq Azııa elderi arasyndaǵy dostyqty nyǵaıtýǵa, halyqtar arasyndaǵy baılanysty tereńdetýge árdaıym kúsh salyp keledi. Biz Ortalyq Azııadaǵy jetekshi medıamen birlesip, joǵary sapaly baǵdarlamalar túsirip, «Ortalyq Azııamen tikeleı baılanys» atty aqparattyq jobalarmen ekijaqty saýda men yntymaqtastyqty keńinen nasıhattap júrmiz. Sondaı-aq, biz Ortalyq Azııa kórermenderine túsinikti jáne jaqyn formatta Qytaıdyń qazirgi damý serpinin jáne baı mádenıetin pash etetin baǵdarlamalar usynyp kelemiz, — dedi CMG prezıdenti.
Aıta keteıik, búgin elordada «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» forýmy ótti. Forým aıasynda «Sı Tszınpınniń súıikti naqyl sózderi» jobasynyń halyqaralyq nusqasynyń tusaýkeseri ótkizildi. «Kıim rámiz retinde: Qytaıdan — álemge» jáne Qytaıdyń CGTN telearnasynyń jýrnalısteri Qazaqstannyń Jibek Joly/Silk Way arnasynyń qoldaýymen júzege asyrǵan «Ortalyq Azııa boıynsha úlken sapar» jobalary qorytyndylandy. Bul joba aıasynda Qazaqstandaǵy ómir týraly reportajdar serııasy túsirildi.
Sonymen qatar Qytaı men Ortalyq Azııa elderiniń jetekshi BAQ platformalarynda júretin «Men Qytaıda oqydym» baǵdarlamasynyń bastalǵany jarııalandy.