Qytaı men Nepal seldiń sebebin anyqtaý úshin birlesken ekspedıtsııa jiberdi
ASTANA. KAZINFORM – Qytaı men Nepal eki el shekarasynda tamyz aıynda bolǵan alapat seldiń sebepterin anyqtaý úshin birlesken ǵylymı-zertteý tobyn jasaqtady, dep habarlaıdy Kazinform agenttiginiń menshikti tilshisi Lianhe Zaobao basylymyna silteme jasap.
Eki eldiń 10-nan astam ýnıversıteti men ǵylymı-zertteý ınstıtýtynan kelgen 50-ge jýyq ǵalym apat bolǵan aýmaqta 20 kún boıy zertteý júrgizedi. Mamandar buǵan sebep bolǵan muz ben taý jynystarynyń opyrylýyn qosa alǵanda, birinen keıin biri týyndaǵan tabıǵı qubylystardyń barysyn zertteıdi.
– Bizge apattan keıingi jaǵdaıdy tıimdi paıdalanyp, epıtsentrdi jedel zerttep, dalalyq baqylaý arqyly mańyzdy derekter jınaý kerek, – dedi Qytaı Ǵylym akademııasynyń akademıgi Van Chenshan.
Qytaılyq mamandar jeksenbi kúni Katmandýǵa keldi. Ekspedıtsııa barysynda ǵalymdar drondar arqyly aýmaqty áýeden túsirip, jer bederiniń úsh ólshemdi modelin jasaıdy jáne dalalyq synamalar alady. Jınalǵan derekter negizinde mamandar tabıǵı apattyń qaıta qaıtalaný qaýpin baǵalap, Gırong ótkizý beketin qaýipsiz ári ornyqty qalpyna keltirýge qatysty usynystar ázirleıdi.
26 tamyzda Gımalaıdyń ortalyq bóliginde bolǵan tabıǵı apat Nepal men Qytaıdyń shekaralas aýdandaryndaǵy ınfraqurylym nysandary men ótkizý beketterin qıratyp ketti. Bılik málimetinshe, Nepal aýmaǵynda 16 qyrkúıekke deıin 1403 adamnyń súıegi tabylǵan, al habar-osharsyz ketkender sany 6000-nan asqan. Qytaı aýmaǵynda 5 qyrkúıektegi jaǵdaı boıynsha 43 adam qaza tapqan, taǵy 519 adam habar-osharsyz ketkender qatarynda.
Buǵan deıin Qytaı-Nepal shekarasynda joǵalǵan qazaqstandyqtardyń áli tabylmaǵanyn habarlaǵan bolatynbyz.
