Qytaı men Qazaqstannyń taýar aınalymy rekordtyq 44 mlrd dollarǵa jetti — Erlan Qarın
ASTANA. KAZINFORM — Qytaı men Ortalyq Azııa elderi arasynda kontent jasaý, tehnologııalarmen almasý jáne mádenı baǵyttaǵy birlesken jumys aıryqsha ózekti bola tústi.
Bul týraly QR Memlekettik keńesshisi Erlan Qarın Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmynda aıtty.
Memlekettik keńesshi búgin Qytaı men Ortalyq Azııa elderi arasyndaǵy yntymaqtastyǵy ǵana emes, mıllıondaǵan adamnyń taǵdyry toǵysqan alyp óńirdiń bolashaǵy talqylanyp otyrǵanyn atap ótti.
— QHR Tóraǵasy Sı Tszınpın aıtqandaı, «Ashyqtyq progreske bastaıdy, al tuıyqtyq artta qalýshylyqqa ákeledi». Bizdiń óńir elderiniń basty ereksheligi — ashyqtyq, joǵary qarqyndy ekonomıkalyq ósý, gýmanıtarlyq jáne medıa salalaryndaǵy tyǵyz yntymaqtastyq. Medıatutynýdyń transformatsııasyn, tsıfrlandyrý men aqparattyq trendterdi eskersek, kontent jasaý, tehnologııalarmen almasý jáne ózara mádenı baıytý baǵyttaryndaǵy birlesken jumys aıryqsha ózekti bola túskenin kórip otyrmyz, — dedi Erlan Qarın forýmnyń ashylýynda.
Kezinde Uly Jibek jolynyń kerýenderi tek taýar emes, bilim de tasymaldaǵan. Sol kezeńniń ózinde alǵashqy kommýnıkatsııalyq jeliler qalyptasa bastaǵan edi.
— Búginde biz bul dástúrdi ınternet, spýtnıktik jáne tsıfrlyq platformalar arqyly jalǵastyryp, medıalarymyzdy biryńǵaı yntymaqtastyq yrǵaǵyna biriktirip otyrmyz. Qazaqstan men Qytaıdyń yntymaqtastyǵyna kelsek, Qytaı — biz úshin tatý kórshi ári senimdi dos. Biz árdaıym ózara tıimdi áriptestikke qatysty ortaq túsinistik tabamyz. Memleket basshysy Qasym-Jomart Toqaev atap ótkendeı, Qytaımen tolyqqandy yntymaqtastyq — Qazaqstannyń turaqty damýy úshin uzaqmerzimdi faktor bolyp sanalady, — dedi Qazaqstannyń Memlekettik keńesshisi.
Qytaı Qazaqstannyń eń iri saýda seriktesi bolyp qala beredi. Byltyr ekijaqty taýar aınalymy rekordtyq 44 mıllıard AQSh dollaryna jetti. Oǵan qosa, Qytaıdan Qazaqstanǵa tartylǵan tikeleı sheteldik ınvestıtsııa aǵymy ósken. Mádenı-gýmanıtarlyq saladaǵy baılanystar da nyǵaıyp keledi.
— Búginde Qytaı álemdegi eń qarqyndy damyp kele jatqan iri ekonomıkalardyń biri jáne jetekshi tehnologııalyq derjavaǵa aınalýda. Óz kezeginde Ortalyq Azııa elderi de eleýli áleýetke ıe bolyp, turaqty ekonomıkalyq ósim kórsetip keledi. Qazaqstan árqashan kórshileriniń tabystaryna qýanady, sebebi bárimiz ortaq damý jolyndamyz jáne árqaısymyzdyń jeńisimiz — ortaq jeńis, — dedi Erlan Qarın.
Buǵan deıin Erlan Qarın Memleket basshysy Qasym-Jomart Toqaevtyń forým qatysýshylaryn quttyqtaý hatyn oqyp bergen edi.
Aıta keteıik, búgin Qazaqstanǵa Qytaı Halyq Respýblıkasynyń Tóraǵasy Sı Tszınpın keldi. Eki kúnge sozylatyn sapar barysynda elaralyq máseleler talqylanyp, memleket basshylary «Ortalyq Azııa — Qytaı» sammıtine qatyspaq.
Qytaı kóshbasshysy mingen bortty el shekarasynan elordaǵa deıin Qazaqstan Respýblıkasy Áýe qorǵanys kúshteriniń ushaqtary alyp júrdi.
Sonymen birge, búgin elordada «Ortalyq Azııa — Qytaı: Energetıka» forýmy aıasynda Qazaqstannyń Energetıka mınıstrligi birqatar kompanııa ókilderimen qujattarǵa qol qoıdy.