Qytaı men Qazaqstan arasynda jańa týrıstik baǵyt ashylady

ASTANA. KAZINFORM – 29 mamyrda Sıan qalasynan «Sıan – Almaty» baǵytyndaǵy alǵashqy týrıstik poıyz jolǵa shyǵady. Bul bastama «Ortalyq Azııa – Qytaı» II sammıti aıasynda uıymdastyryldy.

QR Týrızm jáne sport mınıstrligi baspasóz qyzmetiniń habarlaýynsha, poıyz Almatyǵa 31 mamyrda jetedi dep josparlanǵan. Qonaqtar elimizdiń ońtústik astanasynda 5 kún bolady. Delegatsııa quramynda 250-den astam adam bar: memlekettik organdardyń, bıznes, ǵylym, mádenıet, medıtsına jáne sport salasynyń ókilderi men týrıster. Bul sapardy Sıan qalasy ákiminiń orynbasary Sıao Tsı bastap keledi.

Qonaqtar úshin arnaıy mádenı jáne iskerlik baǵdarlama daıyndalǵan:

– resmı qarsy alý rásimi;

– «Shensı – Almaty» aptalyǵynyń ashylýy;

– jármeńkeler, sımpozıýmdar men iskerlik kezdesýler;

– Almatynyń kórikti jerlerine ekskýrsııalar.

Týrıstik poıyzdyń keri baǵyttaǵy sapary 5 maýsymǵa josparlanǵan.

Bul joba Qytaı Halyq Respýblıkasynyń Memlekettik damý jáne reformalar komıtetiniń bastamasymen, QR Týrızm jáne sport mınıstrligi, «Kazakh Tourism» ulttyq kompanııasy, «Qazaqstan Temir Joly» ulttyq kompanııasy, Syrtqy ister mınıstrligi, Kólik mınıstrligi, Shekara qyzmeti, Іshki ister mınıstrligi, Almaty qalasynyń Týrızm basqarmasy jáne otandyq týroperatorlardyń qoldaýymen júzege asyrylyp otyr.