Qytaı men Eýropany jalǵaıtyn altyn kópir – Prezıdent Beıneý – Sekseýil joly týraly
ASTANA. KAZINFORM – Qasym-Jomart Toqaev «Beıneý – Sekseýil» baǵytynda 800 shaqyrymdyq túbegeıli jańa joldyń qurylysy bastalǵanyna toqtalyp, bul baǵdardy halyqaralyq aýqymdaǵy avtojol dep atady
– Osy jol el aımaqtary arasyndaǵy baılanysty nyǵaıta otyryp, Qytaı men Eýropany jalǵaıtyn «altyn kópir» retinde qyzmet etedi. Bul joba Qytaı shekarasyndaǵy ótkizý beketterin Aqtaý, Quryq porttarymen tikeleı baılanystyrady. Sonyń nátıjesinde Qytaıdan Eýropaǵa deıin júk tasymaldaý uzaqtyǵy 1 myń shaqyrymǵa, al júk jetkizý merzimi 3 táýlikke deıin qysqarady. Halqymyzdyń tanym-túsiniginde qudyq qazý, kópir salý saýapty is sanalady. Osy turǵydan alyp qarasaq, biz ıgiligi barshaǵa ortaq, ıaǵnı ózimiz de, ózgeler de paıdasyn kóretin asa jaýapty jumysty bastap otyrmyz. «Beıneý – Sekseýil» baǵyty respýblıkalyq, aımaqtyq, qurlyqtyq deńgeıdegi mańyzdy jol bolary anyq. Sondyqtan bul joldy «Aral-Kaspıı magıstrali» dep ataǵan durys, – dedi Memleket basshysy.
Sonymen qatar Prezıdent jalpy uzaqtyǵy 774 shaqyrymdy quraıtyn «Qyzylorda – Sekseýil», «Ulǵaısyn – Sekseýil» joldaryn keńeıtý, túbegeıli jańǵyrtý jumystary bastalǵanyn málimdedi.
– Bul joldardyń qurylysymen otandyq kompanııalar aınalysady. Qurylys jumystaryna 10 myńnan astam jumysshy tartylady. Joldar tolyq salynyp bitken soń júk tasymaly 2,5 ese artyp, jylyna 13,2 mıllıon tonnaǵa jetedi. Bul jobalar el ekonomıkasyn órkendetýge, týrızmdi damytýǵa tyń serpin berip, halyqtyń ál-aýqatyn arttyrýǵa septigin tıgizeri sózsiz. Osyndaı jobalardyń árqaısysy tutas Qazaqstannyń kólik júıesimen úılesedi. Buǵan deıin negizinen soltústikten ońtústikke tartylǵan kólik jelileri, endi shyǵystan batysqa qaraı baǵyttalǵan jańa tarmaqtarmen keńeıip jatyr. Basty maqsat – elimizdi Eýropa men Azııany jalǵastyratyn jetekshi logıstıkalyq jeliniń birine aınaldyrý. Qazaqstandaǵy avtokólik tasymaly salasy tabysy jaǵynan temirjol kóligimen teńesti. Sondyqtan joldyń qurylysyn júrgizýmen birge zamanaýı tsıfrlyq ekojúıe qurý mańyzdy mindet sanalady. Jergilikti avtoóndiristi tarta otyryp, otandyq tasymaldaýshylardy qoldaýdyń ulttyq baǵdarlamasyn qabyldaý áleýetti eseleıdi. Munyń bári Qazaqstannyń tranzıttik múmkindikterin keńeıte túsedi. Aral mańyndaǵy ıen dalamen tartylyp jatqan joldar buǵan deıin tuıyq núkte sanalyp kelgen baǵyttardy Eýrazııanyń negizgi kólik dálizderiniń toǵysyna aınaldyrady. Búgin bastaý alyp jatqan jumysty ýaqtyly, ıaǵnı 2029 jyldan keshiktirmeı aıaqtaý óte mańyzdy. Qajetti jaǵdaıdyń barlyǵy jasalyp jatyr. Endi bilek sybana jumysqa kirisý kerek. Biz bir el bolyp, bul mindetti oıdaǵydaı júzege asyramyz. Men buǵan kámil senemin. Barshańyzǵa amandyq, sáttilik jáne tabys tileımin! – dedi Qasym-Jomart Toqaev.
Telekópir barysynda Premer-mınıstrdiń birinshi orynbasary Nurlybek Nálibaev, Aqtóbe oblysynyń ákimi Ashat Shaharov, Mańǵystaý oblysynyń ákimi Nurdáýlet Qılybaı jobany bastaýǵa ázirlik jóninde baıandady.
Budan bólek Qyzylorda oblysy ardagerler keńesiniń tóraǵasy Serik Dúısenbaev sóz sóılep, Prezıdentke óńir turǵyndarynyń rızashylyǵyn jetkizdi.
