Qytaı men Eýropalyq odaq saýdadaǵy túıtkilderdi sheshýge qadam jasady
ASTANA. KAZINFORM — Qytaı men Eýropalyq odaq arasyndaǵy saýda-ınvestıtsııalyq kelissózderdiń alǵashqy kezeńi Beıjińde aıaqtaldy. EO saýda jáne ekonomıkalyq qaýipsizdik jónindegi komıssary Marosh Shefchovıch kezdesýdiń negizgi nátıjelerin jarııalady, dep habarlaıdy Kazinform agenttiginiń Qytaıdaǵy menshikti tilshisi.
Beıjińde Qytaı men Eýropalyq odaq arasyndaǵy eki kúnge sozylǵan saýda-ınvestıtsııalyq kelissózder aıaqtaldy. Kezdesý qorytyndysy boıynsha Eýropalyq odaqtyń saýda jáne ekonomıkalyq qaýipsizdik jónindegi komıssary Marosh Shefchovıch baspasóz máslıhatyn ótkizip, kelissózderdiń negizgi nátıjelerin jarııalady.
Sóz basynda Marosh Shefchovıch Qytaıǵa naqty maqsatpen kelgenin atap ótti.
— Men munda bir aıqyn maqsatpen keldim. Ol — Eýropalyq odaq pen Qytaı arasyndaǵy saýda qatynastaryndaǵy tepe-teńdikti qalpyna keltirý úderisin bastaý jáne saýda-ınvestıtsııalyq konsýltatsııalar tetigi aıasyndaǵy kelissózderdiń alǵashqy kezeńinde naqty nátıjelerge qol jetkizý, — dedi ol.
Komıssardyń aıtýynsha, saýda tapshylyǵy Eýropalyq odaq úshin úlken problemaǵa aınalǵan. Onyń saldary odaqqa múshe árbir memlekette sezilip otyr.
Ol qazirgi jaǵdaıdy turaqsyz dep baǵalap, saýda qatynastaryndaǵy tepe-teńdikti qalpyna keltirýdiń naqty jolyn ázirleý qajet ekenin aıtty.
— Biz óz ónerkásibimizdi qorǵap, jahandyq deńgeıdegi óndiristik qýattardyń shamadan tys artýyna baılanysty buzylǵan ádil básekelestik jaǵdaıyn qalpyna keltirýimiz kerek, — dep atap ótti Marosh Shefchovıch.
Aıta keteıik, jaqynda Qytaı EO-men saýda kelissózderi qarsańynda ımportqa qatysty tergeýdi bastady.
