Qytaı men Eýropa arasyndaǵy qurlyq júk tasymalynyń 80% Qazaqstan arqyly ótedi — Toqaev
ASTANA. KAZINFORM — Memleket basshysy Qasym-Jomart Toqaev Kaspııden Afrıkaǵa deıin sozylatyn Azııa men Eýropa arasyndaǵy eń senimdi jáne qaýipsiz kólik jelisin qurýdy usyndy.
— Qazaqstan Kaspıı teńizi portyn jańǵyrtý men júıeleý, júk termınaldaryn salý, kólik kemelerin birlesip óndirý baǵytynda júıeli qadam jasap jatyr. Bul transkaspıı baǵdarynyń tartymdylyǵyn arttyra túsedi, ásirese Qytaı men Eýropa arasyndaǵy qurlyqtaǵy júk tasymalynyń 80 paıyzy elimizdiń aýmaǵy arqyly ótetinin eskersek, — dedi Qasym-Jomart Toqaev elordada ótip jatqan «Ortalyq Azııa — Italııa» birinshi sammıtinde.
Osy oraıda Memleket basshysy ıtalııalyq seriktesterdi atalǵan protseske belsendi qatysýǵa shaqyrdy.
— Italııanyń eýropalyq kólik jelisi men Global Gateway strategııasymen úshinshi dálizdi túıistirýge qatysty jobany belsendi qoldaýyna senim artamyz. Sırııamen birlesip, bul kólik baǵytyn Kaspııden Afrıkaǵa deıin sozylatyn Azııa men Eýropa arasyndaǵy eń senimdi jáne qaýipsiz kópirlerdiń birine aınaldyrýǵa úmittimiz, — deıdi Prezıdent.
Buǵan deıin Prezıdent Italııanyń joǵary oqý oryndaryn Qazaqstanda fılıalyn ashýǵa shaqyrdy.
Aıta keteıik, 2026 jyl «Ortalyq Azııa men Italııanyń» mádenı qozǵalys jyly retinde atalyp ótedi.
Qazir elordada «Ortalyq Azııa — Italııa» birinshi sammıti ótip jatyr. Oǵan Qazaqstan Prezıdenti Qasym-Jomart Toqaev, Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp jatyr.