Qytaı men EO elektrlik kólikterdiń baǵasy jóninde kelissóz júrgizbek
ASTANA. KAZINFORM - Eýroodaq 10 sáýir kúni resmı Beıjińmen Qytaıda óndirilgen elektrlik kólikter úshin eń tómengi baǵa belgileý týraly kelisimge kelgenin málimdedi. Bul kelisim EO-nyń qytaılyq elektrlik kólikterge qosymsha baj salyǵyn engizý týraly byltyrǵy sheshimin almastyrýǵa baǵyttalǵan.
Lianhe Zaobao basylymynyń habarlaýynsha, atalǵan másele boıynsha kelissózder bastalyp ketken. Eýroodaqtyń málimeti boıynsha, Eýrokomıssııanyń saýda jáne ekonomıkalyq qaýipsizdik jónindegi komıssary Marosh Shefchovıch Qytaıdyń saýda mınıstri Van Ventaomen telefon arqyly sóılesken, qos tarap Qytaıdyń elektrlik kólikterine eń tómengi baǵa belgileý máselesin talqylaýǵa kelisken.
Al Qytaı Saýda mınıstrliginiń búgingi habarlamasyna sáıkes, Van Ventao Shefchovıchpen 8 sáýir kúni telefon arqyly sóılesken, taraptar naryqqa qoljetimdilik máselesi jónindegi konsýltatsııalardy tez arada bastaýǵa, elektrlik kólikterdiń baǵasy boıynsha mindettemeler týraly kelissózderdi dereý qolǵa alýǵa jáne avtokólik ónerkásibi salasyndaǵy ınvestıtsııalyq yntymaqtastyq máselesin talqylaýǵa ýaǵdalasqan.
Buǵan deıin Shefchovıch shekti baǵa belgileý týraly kezkelgen sharanyń tıimdiligi men baqylaný múmkindigi EO-nyń qazirgi tarıftik sharalarynan olqy soqpaýǵa tıis ekenin atap ótken bolatyn.
Eýroodaq ótken jyldyń qazan aıynda Qytaıdan jetkiziletin elektrlik kólikterge jalpy mólsheri 45,3%-dan kem emes antıdempıngtik qosymsha baj salyǵyn engizgen bolatyn. Qarymta retinde Qytaı EO-dan ákelinetin brendı ónimderine ýaqytsha antıdempıngtik baj salyǵyn engizdi. Bul sharalar Hennessy, Rémy Cointreau jáne Pernod Ricard sekildi transulttyq kompanııalardyń tabysyna eleýli áserin tıgizdi.
Buǵan deıin Qytaı elektrlik kólikter úshin 30 myń eýro kóleminde eń tómengi baǵa belgileý týraly usynys engizgen, alaıda EO bul usynysty qabyldamaǵan edi.
Basylymnyń jazýynsha, AQSh tarapynan Eýropa men Qytaıǵa qarsy engizilgen qosymsha baj salyqtarynyń qysymyna baılanysty, Eýroodaq pen Qytaı elektrlik kólikter boıynsha jańa kelissózderdi bastaýǵa májbúr bolyp otyr. 9 sáýir kúni AQSh prezıdenti Donald Tramp Qytaıdan ózge elderge qosymsha baj salyǵynyń engizilýin 90 kúnge kidirtý týraly sheshim qabyldady.
Alaıda Qytaıǵa qarsy jalpy salyq mólsheri 145%-ǵa kóterildi.