Qytaı men AQSh tarıf máselesi boıynsha konsýltatsııa ótkizgen joq - Qytaı SІM

ASTANA.KAZINFORM - Qytaı men AQSh tarıf máselesi boıynsha konsýltatsııalar ótkizgen joq. Bul týraly beısenbi kúni Qytaı Syrtqy ister mınıstrliginiń resmı ókili Go Tszıakýn eki jaqtyń tarıf máselesi boıynsha kelissózder bastady degen jańalyqqa túsinik bere otyryp aıtty, dep habarlaıdy Kazinform.

- Bul jalǵan aqparat. Qytaı men AQSh kelisimge kelý bylaı tursyn, tarıf máselesi boıynsha konsýltatsııalar nemese kelissózder júrgizgen joq,- dedi ol.

Onyń aıtýynsha, tarıftik soǵys AQSh-tyń bastamasymen bolǵan, al Qytaıdyń ustanymy «dáıekti jáne aıqyn».

- Biz kúressek, sońyna deıin baramyz. Áńgimelesetin bolsaq, esik ashyq, dıalog pen kelissózder teń dárejede, syılastyqta jáne ózara tıimdi bolýy kerek, - dep atap ótti QHR Syrtqy ister mınıstrliginiń ókili.

Osyǵan deıin Qytaı Tramp ákimshiligin ózara tarıfterden tolyqtaı bas tartýǵa shaqyrǵan bolatyn.