Qytaı men AQSh esirtkige qarsy yntymaqtastyqty nyǵaıtady

ASTANA. KAZINFORM — Qytaı men AQSh esirtkige qarsy kúres salasynda barlaý aqparattarymen almasýdy jalǵastyryp jatyr, dep habarlaıdy Sınhýa.

10–12 aqpan kúnderi AQSh-ta Qytaı men AQSh arasyndaǵy esirtkige qarsy kúres baǵytyndaǵy barlaý málimetterimen almasý jónindegi 11-shi kezdesý ótti. Bul týraly juma kúni Qytaı Halyq Respýblıkasynyń Qoǵamdyq qaýipsizdik mınıstrligi habarlady. Kezdesýge eki eldiń tıisti vedomstvolarynyń delegatsııalary qatysty.

Kezdesý barysynda taraptar esirtki ahýalyna qatysty birqatar máselelerdi jan-jaqty talqylady. Atap aıtqanda, zańsyz onlaın-kontentti joıý, birlesken tergeý júrgizý, hımııalyq zattardy baqylaý jáne esirtkige baılanysty ister boıynsha aqshany jylystatýǵa qarsy kúres máseleleri qaraldy.

Taraptar sońǵy jetistikteri týraly aqparat almasyp, pikirler men usynystaryn ortaǵa saldy jáne aldaǵy yntymaqtastyqtyń negizgi baǵyttaryn aıqyndady.

Sondaı-aq teńdik pen ózara qurmet qaǵıdattary negizinde esirtkige qarsy kúreste praktıkalyq ári tıimdi seriktestikti damytýǵa ýaǵdalasty.

Aıta keteıik, Qytaı–AQSh arasyndaǵy bul kezdesý alǵash ret 2002 jyly ótken. Ol eki eldiń quqyq qorǵaý organdary arasyndaǵy esirtkige qarsy yntymaqtastyqtyń negizgi ınstıtýtsıonaldyq alańy sanalady jáne kezekpen uıymdastyrylady.

Buǵan deıin AQSh pen Qytaı jasandy ıntellekt salasynda kóshbasshy atanǵanyn jazǵanbyz.