Qytaı men AQSh daýly ekonomıkalyq máselelerdi retteý boıynsha kelisimge keldi

ASTANA. KAZINFORM — Qytaı men Amerıka Qurama Shtattary ózara múddelerge qatysty birqatar saýda-ekonomıkalyq máseleler boıynsha bazalyq kelisimge qol jetkizdi, dep habarlaıdy Sınhýa.

Qytaı Kommertsııa mınıstriniń orynbasary jáne halyqaralyq saýda kelissózderindegi QHR ókili Lı Chengan Kýala-Lýmpýrda ótken jańa kelissózder raýndynan keıingi baspasóz máslıhatynda bul týraly málimdedi.

Onyń aıtýynsha, eki kúnge sozylǵan talqylaýlar barysynda taraptar AQSh-tyń Qytaıdyń teńiz, logıstıka jáne keme jasaý salalaryna qatysty 301-bólim aıasyndaǵy sharalaryn, aına bajdaryn ýaqytsha toqtatý merzimin uzartý, fentanılge baılanysty baj salyǵy, esirtkige qarsy yntymaqtastyq, sondaı-aq eksporttyq baqylaý jáne saýda damýy sııaqty máselelerdi talqylady.

Lı Chengan sońǵy aıda Qytaı men AQSh arasyndaǵy qarym-qatynastarda «turaqsyzdyq pen tolqýlar» bolǵanyn atap ótti. Degenmen, Pekın eki el basshylarynyń Jenevadaǵy kelissózder men telefon arqyly ótken áńgimelerinde jasalǵan ýaǵdalastyqtardy júıeli túrde oryndap otyrǵanyn aıtty.

— Mundaı turaqsyzdyq Qytaı qalaıtyndaı jaǵdaı emes, — dedi QHR ókili.

Onyń sózinshe, taraptar «ashyq ári syndarly» pikir almasyp, ózara qurmet pen teń quqyqtyq qaǵıdattaryn saqtaǵan.

Qajetti ishki rásimder aıaqtalǵan soń, Qytaı men AQSh saýda-ekonomıkalyq qatynastardy turaqty ári senimdi damytý maqsatynda ózara dıalogty jalǵastyrýǵa nıetti.

Buǵan deıin Eýropalyq odaqtyń Qytaıdan sırek jer metaldaryn jetkizýge táýeldilikti azaıtýǵa baǵyttalǵan strategııa ázirlep jatqany habarlanǵan edi.