Qytaı men AQSh basshylary Perýde kezdesýi múmkin
ASTANA. KAZINFORM – 15-16 qarasha kúnderi Perý astanasy Lımada Azııa-Tynyq muhıty ekonomıkalyq yntymaqtastyǵy (APEC) kóshbasshylarynyń 31-beıresmı kezdesýi ótedi. Bul sharaǵa Qytaı men Amerıka Qurama Shtattarynyń basshylary qatyspaq. Bul týraly RFI habarlaıdy.
AQSh ulttyq qaýipsizdik keńesshisi Djeıkob Sallıvan sársenbide (13 qarasha) AQSh prezıdenti Djozef Baıden Perý astanasy Lımada Qytaı tóraǵasy Sı Tszınpınmen kezdesedi dep málimdedi.
Sallıvan kezdesý kúnin rastamady, biraq eki alyp memleket basshylary kezdesýi múmkin degen boljam bar.
Bul Baıden men Sı Tszınpınniń 2023 jyldyń qarashasynan keıingi alǵashqy betpe-bet kezdesýi bolmaq.
Eki jaq AQSh pen Qytaı arasyndaǵy shıelenisterdi qosa alǵanda, birqatar jahandyq ózekti máselelerdi talqylaıdy dep kútilýde, sonymen qatar Taıvan buǵazy, Ońtústik Qytaı teńizi jáne Reseı-Ýkraına soǵysy sııaqty máseleler boıynsha shıelenisti azaıtýǵa tyrysady.
Jańadan saılanǵan AQSh prezıdenti Tramp resmı túrde kelesi jyldyń qańtarynda qyzmetine kirisetindikten, bul Baıden men Sı Tszınpınniń onyń ókilettigi kezindegi sońǵy kezdesýi bolady dep kútilýde.
Tramp Qytaıǵa qosymsha tarıfter engizýdi josparlap otyr. Sondyqtan, keıbir sarapshylar Baıden AQSh-Qytaı sammıti arqyly ekijaqty qarym-qatynastardy turaqtandyrýǵa, sol arqyly bıliktiń kedergisiz aýysýyna yqpal etýge úmittenedi dep esepteıdi.