Qytaı maımyl sheshegine baılanysty shekaralyq baqylaýdy kúsheıtti

ASTANA. KAZINFORM – Qytaı bıligi elde maımyl sheshegi aýrýynyń taralýyna jol bermeý úshin baqylaý-ótkizý beketterinde sanıtarlyq-epıdemıologııalyq baqylaý sharalaryn kúsheıtip jatyr. Tıisti qaýlyny 15 tamyzda Qytaı Halyq Respýblıkasynyń Bas keden basqarmasy (BKB) jarııalady.

Qytaı Dúnıejúzilik densaýlyq saqtaý uıymy (DDU) halyqaralyq alańdaýshylyq týdyrǵan qoǵamdyq densaýlyq saqtaý salasyndaǵy tótenshe jaǵdaı dep jarııalaǵan shetelden sheshek belgilerimen keletin adamdardy tekserýdi bastaıtynyn jarııalady. 

Bul sharalar maımyl sheshegi indetiniń Qytaıǵa enýine jol bermeýge jáne halyqtyń densaýlyǵyn saqtaýǵa baǵyttalǵan.

QHR BKB habarlamasynda atap ótilgendeı, maımyl shesheginiń oshaǵy bolǵan elderden (aımaqtardan) kelgen, maımyl sheshegimen aýyratyn naýqastarmen baılanysta bolǵan nemese aýrý belgileri bar adamdar bul týraly elge kirgen kezde aldyn ala eskertýge mindetti. Keden qyzmetkerleri belgilengen tártipte medıtsınalyq sharalar qabyldap, synamalar alyp, synaqtama júrgizedi. 

Maımyl shesheginiń oshaǵy bolǵan elderden (aımaqtardan) kelgen, aýrý juqtyrǵan nemese juqtyrýy múmkin kólik quraldary, konteınerler, júkter jáne zattar belgilengen protsedýralarǵa sáıkes sanıtarlyq óńdeýden ótýi tıis. 

QHR BKB habarlamasyna sáıkes, onyń erejeleri jarııalanǵan sátten bastap kúshine enedi jáne alty aı boıy áreket etedi.

Eske sala ketsek, Dúnıejúzilik densaýlyq saqtaý basqarmasy Afrıkada keń taralǵan, ásirese Kongo Respýblıkasynda áserin kúsheıtken maımyl sheshek vırýsyna (M-pox) baılanysty jahandyq tótenshe jaǵdaı jarııalady. 

Shvetsııa úkimeti elde maımyl sheshegi (M-pox) aýrýy tirkelgenin habarlady.