Qytaı Marstan ákelinetin topyraqty zertteıtin arnaıy zerthana turǵyzady
ASTANA. KAZINFORM — Qytaı Marstan topyraq úlgisin Jerge jetkizý mıssııasyna daıyndyq aıasynda planetalyq qorǵanys zerthanasyn salýdy josparlap otyr, dep habarlaıdy Xinhua.
Nysan Anhoı provıntsııasynyń Hefeı qalasyndaǵy Tereń ǵaryshty zertteý ǵylymı-tehnologııalyq qalashyǵynyń birinshi kezeńi aýmaǵynda boı kóteredi. Zerthanany paıdalaný jumystarynyń bir bóligin Tereń ǵaryshty zertteý zerthanasy (DSEL) atqarady.
Zerthanada Marstan jetkiziletin úlgilerdiń de, Jer bıosferasynyń da qaýipsizdigin qamtamasyz etetin ekijaqty qorǵanys júıesi engiziledi.
Onyń negizgi mindetterine úlgilerdi zararsyzdandyrý, konteınerlerdi ashý, topyraqty óńdeý jáne bıologııalyq qaýip-qaterdi baǵalaý kiredi.
DSEL-diń damý strategııasy departamentiniń dırektory Lı Hannyń aıtýynsha, Qytaı Jerdegi mıkroaǵzalardyń Marsqa taralýyna jol bermeý jáne Jerdi yqtımal ǵalamshardan tys tirshilik nysandarynan qorǵaý maqsatynda Ǵaryshtyq zertteýler jónindegi komıtettiń planetalyq qorǵanys qaǵıdalaryn saqtaıdy.
«Tıanven-3» mıssııasy aıasyndaǵy ǵarysh apparatyn ushyrý shamamen 2028 jylǵa josparlanǵan. Al Mars topyraǵynyń úlgilerin jınap, Jerge jetkizý 2031 jyly júzege asady dep kútilýde.
Buǵan deıin Qytaıdyń Marsqa arnalǵan mıssııaǵa qatysatyn halyqaralyq seriktesterdi irikteýdi aıaqtaǵany habarlanǵan bolatyn.
