Qytaı quramasynyń kapıtany: Biz qazaqstandyqtardan kóp nárse úırendik
HARBIN.KAZINFORM – Hokkeıden Qytaı erler quramasynyń kapıtany Chjan Tszıatsı Kazinform tilshisine eksklıýzvti suhbat berip, hokkeıden Qazaqstan quramasynyń deńgeıin joǵary baǵalady.
Qytaılyq sportshy eń áýeli jarys týraly oıymen bólisti.
– Jarys óz alańymyzda ótip jatqandyqtan, bar kúshimizdi salyp, ózimizdi synap kórgimiz keldi. Qazaqstan quramasynyń deńgeıi bizden joǵary bolǵanyna qaramastan, biz úmit úzbeı, synaqqa betpe-bet keldik, - dedi Chjan Tszıatsı.
Qytaı quramasynyń kapıtany jarys nátıjesi kóńilderinen shyǵatynyn aıtty.
– Nátıje qanaǵattandyrarlyq. Biz qorǵanysta jaqsy oınadyq. Birinshi kezeńde qarsylastarǵa múmkindik bergen joqpyz. Tipti úshinshi kezeńde bir shaıba soǵyp kettik. Qazaqstanmen oıyn qıyn bolatynyn bildik. Alaıda, biz olardan tájirıbe alýǵa tyrystyq, - deıdi ol.
Sonymen qatar, Chjan Tszıatsı Qazaqstan quramasynan kóp nárse úırengenin aıta ketti.
– Qazaqstan quramasy árqashan myqty boldy. Biz de olardan kóp nárse úırendik. Olardyń pas berýi jáne alańdaǵy qozǵalysy óte jyldam. Ásirese olar pasty qaqpanyń artynan bizdiń qorǵanys aımaǵymyzǵa dál jetkize alady. Bul óte keremet, - deıdi Qytaı hokkeı quramasynyń kapıtany.
Aıta keteıik, Qazaqstan erler hokkeı quramasy búgin qysqy Azııa oıyndarynyń jartylaı fınalynda Qytaıdy 3:1 esebimen jeńip, fınalǵa joldama aldy.
Toptyq kezeńdegi kezdesýde, Qazaqstan quramasy qytaılyqtarǵa 6 shaıba soqqan bolatyn.
Sondaı-aq, Harbın qalasynyń turǵyny Van Rýı Kazinfrom tilshisine qazaqstandyq hokkeıshilerdiń deńgeıi Azııa elderi arasynda joǵary ekenin aıtqan bolatyn.