Qytaı quramasyndaǵy qazaq qyzy: Almatydaǵy qysqy Azııa oıyndaryna qatysqym keledi
MILAN. KAZINFORM – 21 aqpan kúni Mılan jáne Kortına-d’Ampetstsoda ótip jatqan XXV qysqy Olımpıada oıyndarynyń konkımen júgirý dodasy óz máresine jetti.
Áıelder arasynda mass-start básekesinde Qytaı quramasy sapynda ulty qazaq jalǵyz qandasymyz Aqnar Adaqqyzy jarys jolyna shyqty. Osy oraıda, sportshy Kazinform tilshisine eksklıýzıv suhbat berip, aldaǵy josparlarymen bólisti.
Aqnar Adaqqyzy 2029 jylǵy qysqy Azııa oıyndarynyń Almatyda ótetini týraly habardy estigende qatty qýanǵanyn jasyrmady.
- Shynymdy aıtsam, Olımpıada oıyndarynan keıin sporttyq mansabymdy aıaqtaý oıymda boldy. Alaıda, Almatyda 2029 jylǵy qysqy Azııa oıyndary ótedi degendi estip, qatty qýandym. Bul meniń qaıta sheshim jasaýyma túrtki boldy. Ózime jańa maqsat qoıyp, Almatydaǵy aq Azııadada baq synap kórsem dep armandaımyn,- dedi ol.
Sondaı-aq, sportshy búgingi jarys nátıjesi jáne aldaǵy maqsaty týraly oıyn aıtty.
- Men úshin ekinshi Olımpıada resmı aıaqtaldy. Jalpy, jarysta jeńiske jetýge barymdy salyp, tyrystym. Básekelestik óte joǵary boldy. Bul Olımpıada oıyny bolǵandyqtan, eshkim aıanyp qalmasy anyq. Endi alda taǵy tórt jyldyqtyń basty dodasy kele jatyr. Sol sebepti, bosańsyp qalmaı búgingi kúnnen bastap maqsatym úshin kúresemin,- dedi qandasymyz.
Aıta ketıik, Aqnar Adaqqyzy konkımen júgirýde áıelder arasynda komandalyq iz qýý jáne mass-start dodasynda baq synady.
Konkıshi — Shynjań ólkesi, Qutybı aýdanynda dúnıege kelgen. Birneshe márte Qytaı chempıony, qysqy Azııa oıyndarynyń jáne basqa da halyqarylyq jarystardyń jeńimpazy.
Sonymen qatar, ol Beıjińdegi XXIV qysqy Olımpıada oıyndarynda Qytaı quramasy sapynda óner kórsetken.