Qytaı qorshaǵan ortany saýyqtyrýdyń bes jyldyq josparyn jarııalady

ASTANA. KAZINFORM — Qytaı bıligi 2025–2030 jyldar aralyǵynda halyq densaýlyǵyn qorǵaý maqsatynda qorshaǵan ortanyń jaǵdaıyn jaqsartýǵa baǵyttalǵan is-qımyl josparyn jarııalady, dep habarlaıdy Sınhýa.

Qujat QHR Aýrýlardyń aldyn alý jáne baqylaý jónindegi memlekettik basqarmasy men basqa da birneshe memlekettik mekeme birlesip ázirlegen. Onda qorshaǵan ortany ekologııalyq jaǵynan qaýipsiz ári ómir súrýge qolaıly etýge baǵyttalǵan 16 naqty shara usynylǵan.

Sońǵy jyldary Qytaıda qorshaǵan ortany saýyqtyrý baǵytynda eleýli jetistikterge qol jetkizildi: qaldyqtardy suryptaý jáne kádege jaratý júıesi ońtaılandyrylyp, aýany lastaýmen kúres sharalary kúsheıtildi, tótenshe jaǵdaılarǵa ekologııalyq gıgıena salasynda áreket etý múmkindikteri artty. Alaıda jahandyq klımattyq ózgeristerdiń údeýi bul salada jańa syn-qaterler týyndatyp jatyr.

Jospardaǵy negizgi sharalar qatarynda:

• turǵyndar arasynda teńgerimdi tamaqtaný men qalypty dene belsendiligin yntalandyrý,

• turǵyn aýdandarda qaldyqtardy basqarý men suryptaýdy jetildirý,

• kógaldandyrý jumystaryn ilgeriletý,

• jaıly jaıaý júrginshiler joldaryn salý,

• ártúrli memlekettik mekemelerdiń ekologııalyq saıasattaryn tıimdi biriktirý,

• qorshaǵan ortany baqylaý, qaýipterdi baǵalaý jáne erte eskertý júıelerin jetildirý bar.

Jospar 2030 jylǵa qaraı mynadaı eki negizgi maqsatqa qol jetkizýdi kózdeıdi:

1. Іshýge jaramdy sýdyń sapasyn úzdiksiz jaqsartý;

2. Qoǵamnyń qorshaǵan orta men densaýlyqqa qatysty aqparattaný deńgeıin keminde 25%-ǵa deıin arttyrý.

— Qorshaǵan ortanyń densaýlyqqa áserin eskeretin ustanymdar túrli salalardaǵy memlekettik saıasatqa ıntegratsııalanýy tıis, — dep málimdedi Aýrýlardyń aldyn alý jáne baqylaý jónindegi memlekettik basqarmasynyń ókili.

Vedomstvo qujatty jurtshylyq arasynda keńinen túsindirý, memlekettik organdarmen ózara úılestirýdi nyǵaıtý jáne jergilikti bılikke jaǵdaıǵa saı ekologııalyq ortany jaqsartý boıynsha ádistemelik kómek kórsetý jumystaryn jalǵastyrmaq.

Osydan buryn Qytaı bala kútimi boıynsha sýbsıdııaǵa 12,6 mlrd dollar bóletini belgili boldy.