Qytaı Qorǵanys mınıstrligi Japonııanyń syrtqy qaýipterdi asyra kórsetýin synǵa aldy
ASTANA. KAZINFORM – Qytaı Qorǵanys mınıstrligi Japonııa bıligin «jasyryn maqsatpen syrtqy qaýip-qaterdi asyra kórsetip otyr» dep aıyptady, dep habarlaıdy Sınhýa.
QHR Qorǵanys mınıstrliginiń resmı ókili Tszıan Bın bul pikirdi vedomstvonyń kezekti baspasóz máslıhatynda jýrnalısterdiń suraǵyna jaýap berý kezinde aıtty. Ol Japonııa premer-mınıstriniń el qaýipsizdik salasynda Ekinshi dúnıejúzilik soǵystan beri eń kúrdeli kezeńdi bastan ótkerip jatyr degen málimdemesine qatysty túsinikteme berdi.
Tszıan Bınniń aıtýynsha, Azııa halyqtaryna jáne álemge úlken zardap ákelgen agressııalyq áreketteri úshin tolyq tarıhı qorytyndy jasamaǵan Japonııa búgingi kúni de «syrtqy qaýip» týraly málimdemelerdi ádeıi kúsheıtip otyr.
– Japonııa ákimshiliginiń shynaıy maqsaty – ishki máselelerden qoǵam nazaryn basqa jaqqa burý, halyqaralyq qaýymdastyqty jańylystyrý jáne qaıta qarýlaný úderisin jedeldetý, – dedi ol.
Mınıstrlik ókili Japonııa ulttyq qaýipsizdikke qatysty úsh negizgi qujatty qaıta qaraýdy alǵa jyljytyp, soqqy berý múmkindigi bar áskerı áleýetti kúsheıtip jatqanyn atap ótti. Sondaı-aq elde ıadrolyq qarýǵa ıe bolý máselesi de talqylanyp jatqanyn aıtty.
Tszıan Bın mundaı qadamdar óńirdegi turaqtylyqqa qaýip tóndirýi múmkin ekenin aıtyp, halyqaralyq qaýymdastyqty Japonııadaǵy «jańa mılıtarızmniń» qaıta jandanýyna jol bermeýge shaqyrdy.
Onyń sózinshe, beıbitshilikti qoldaıtyn elder aımaqtyq qaýipsizdik pen turaqtylyqty saqtaý úshin birlesip áreket etýi qajet.
Aıta keteıik, búgin Qytaı Fılıppınnen de arandatýshylyq pen jalǵan aqparatty dereý toqtatýdy talap etti.
