Qytaı kompanııasyna hýsıtterge qoldaý kórsetti degen aıyp taǵyldy

ASTANA.KAZINFORM  — AQSh Qytaıdyń «Changýan ǵaryshtyq spýtnık tehnologııasy» kompanııasyn Iemendegi hýsıtter qozǵalysyna spýtnıktik sýretter arqyly qoldaý kórsetti dep aıyptady.

Reuters agenttiginiń habarlaýynsha, 17 sáýir kúni AQSh Memlekettik departamentiniń ókili Temmı Brıýs bul kompanııanyń hýsıtterge tikeleı kómek kórsetip otyrǵanyn málimdedi. Onyń aıtýynsha, Qytaı úkimeti bul máselege qatysty AQSh-pen baılanys ornatqanyna qaramastan, kompanııany qoldaýdy jalǵastyrýda.

— Bul Qytaıdyń «beıbitshilikti qoldaımyz» degen málimdemesiniń negizsiz ekendigin dáleldeıdi, — dedi ol.

Bastapqyda Brıýs kompanııanyń hýsıtterge naqty qandaı qoldaý kórsetkenin aıtpaǵan. Alaıda keıinirek ol «qytaılyq kompanııa hýsıtterge spýtnıktik sýretter bergenin» naqtylady.

Eske sala keteıik, hýsıtter 2023 jyldyń qarasha aıynan bastap Qyzyl teńiz ben Aden shyǵanaǵyndaǵy kemelerge shabýyl jasaı bastady. Hýsıtter bul shabýyldardy Gaza sektoryndaǵy palestınalyqtarǵa qoldaý kórsetý úshin jasap jatqanyn málimdedi. Bul shabýyldar Sýets kanalynan ótetin júk tasymalyna kedergi keltirip, kóptegen kompanııalardy Afrıkanyń ońtústigi arqyly aınalma jolmen júrýge májbúr etti. Nátıjesinde júk tasymaldaý quny kúrt ósti.

Aıta ketsek, «Changýan ǵaryshtyq spýtnık tehnologııasy» kompanııasy 2023 jyly AQSh sanktsııa tizimine engizilgen bolatyn. Sebebi, ol Reseıdiń Ýkraınaǵa qarsy soǵysynda mańyzdy ról atqarǵan Vagner tobyna joǵary dáldiktegi spýtnıktik sýretter bergen degen kúdikke ilikken. Atalǵan Vagner toby keıinirek ishki sebepterge baılanysty ydyrady.

Buǵan deıin Qytaı munaı alý kanaldaryn AQSh-tan Kanadaǵa aýystyrǵanyn jazǵan bolatynbyz.