Qytaı kompanııasy Atyraýdaǵy jerasty sýynyń kóterilý sebebin zertteýi múmkin

ATYRAÝ. KAZINFORM – Atyraý qalasynda jerasty sýy kóterilip, jeke turǵyn úı ıelerin qıyndyqty ushyratyp otyr.

Atyraý oblysy ákimi Serik Shápkenovtiń aıtýynsha, byltyr Atyraý oblysy men Qytaı Halyq Respýblıkasy arasyndaǵy syrtqy saýda aınalymy 3 mlrd 242 mln AQSh dollaryna jetken. Onyń ishinde eksport – 3 mlrd 79 mln, al ımport 163 mln AQSh dollaryna jetti.

Qazir óńirde káriz júıesin salý, jerasty sýyn óńdeý, paıdalaný jáne áleýmettik nysandar salý ózekti máselege aınalyp otyr. Oblys ákimi men «Qytaı qurylys korporatsııasynyń úshinshi ınjenerlik bıýrosy» kompanııasynyń basshysy Lıý Mınniń kezdesýinde osy máselelerge basymdyq berildi.

«Biz óńirge ınvestıtsııa tartyp, ındýstrııany damytýǵa basymdyq berip otyrmyz. Qytaı – ınnovatsııalyq-ındýstrııalyq jobalardy qarqyndy órkendetken memlekettiń biri. Eki el arasyndaǵy yntymaqtastyq pen seriktestikti odan ári damytýǵa múmkindik mol. Bul kezdesý alda qolǵa alynatyn jobalarǵa serpin beredi», - dedi Serik Shápkenov.

Qytaılyq kompanııa basshysy Lıý Mınniń pikirinshe, Atyraý oblysynda kóterilgen jerasty sýyn qalypqa keltirý úshin drenaj júıesin salý qajet. Osyǵan oraı zertteý jumysyn júrgizý úshin tıisti mamandar jiberiledi.

«Mundaı másele bizdiń Shenchjen qalasynda da týyndady. Sol kezde biz tıisti zertteý júrgizip, máseleni oń sheshtik. Bizdiń tájirıbemiz bar. Tuzdy jerdiń sýyn tazalaý – óte jeńil protsess. Buǵan arnaıy merzim qajet. Keıin kompanııanyń arnaıy mamandary belgilengen aýmaqtarǵa zertteý júrgizýge keledi. Birlese jumys istesek, eki el ekonomıkasyn odan ári órkendetýge, jerasty sýynyń kóterilý máselesin sheshýge serpin bererine senemin», - dedi Lıý Mın.

Eske sala ketelik, budan buryn atyraýlyq ǵalymdar ushaq pen jolda muz qatyrmaıtyn reagent jasap shyǵarǵanyn habarlaǵan edik.