Qytaı kompanııasy Almatyda taý-ken salasyna arnalǵan ǵylymı-zertteý ınstıtýtyn ashady
ALMATY. KAZINFORM – Elimizdiń ońtústik astanasynda «Almaty – Shanhaı» bıznes forýmy ótip jatyr.
Almaty ákimdiginiń málimetinshe, is-shara barysynda Beijing Fuxing Yihua Technology Co. Ltd. kompanııasy ınvestıtsııalyq jobasyn tanystyrdy. Bastama aıasynda qalada taý-ken ónerkásibine baǵyttalǵan ǵylymı-zertteý ınstıtýtyn ashý josparlanyp otyr.
Joba mıneraldyq shıkizattyń quramyn taldaýǵa, baıytý synaqtaryn jobalaýǵa jáne metallýrgııalyq úderisterdi ázirleýge mamandanbaq. Beıjińdegi Fuxing Yihua kompanııasynyń ókilderi Qazaqstan taý-ken salasynda aıtarlyqtaı áleýetke ıe ekenin atap ótti. Biraq onyń aıtýynsha, birqatar baǵytta ǵylymı-tehnologııalyq saraptama tapshylyǵy saqtalyp otyr.
- Qazaqstan – taý-ken óndirisi qarqyndy damyǵan iri elderdiń biri. Mıneraldyq shıkizatty taldaý, baıytý synaqtaryn júrgizý jáne metallýrgııalyq úderisterdi ázirleý baǵyttarynda áli de suranys bar. Biz bul naryqtyń múmkindigin joǵary baǵalaımyz, – dedi kompanııa ókilderi.
Eki megapolıs arasyndaǵy saýda-ekonomıkalyq jáne ınvestıtsııalyq baılanysty nyǵaıtýǵa baǵyttalǵan «Almaty – Shanhaı» bıznes forýmyna Shanhaı meri Gýn Chjen bastaǵan delegatsııa qatysty. Forým qorytyndysy boıynsha 2,7 mlrd AQSh dollarynan asatyn birlesken ınvestıtsııalyq jobalardy iske asyrýǵa baǵyttalǵan birqatar strategııalyq mańyzdy memorandým men kelisimge qol qoıyldy.
Eske salaıyq, Qazaqstanda ǵylymı-zertteý jumystaryna jumsalǵan shyǵyndar 19% ósti.
