Qytaı kompanııalarynyń jahandyq jasandy ıntellekt naryǵyndaǵy úlesi 15%-ǵa jetti

ASTANA. KAZINFORM — Qytaıda jasandy ıntellekt (JI) salasynda jumys isteıtin 5,3 myńnan astam kompanııa bar. Olardyń jıyntyq úlesi jahandyq naryqta 15%-ǵa jetti, dep habarlaıdy Sınhýa. 

Qytaı Halyq Respýblıkasynyń Aqparattyq jáne kommýnıkatsııalyq tehnologııalar akademııasynyń derekterine sáıkes, 2024 jyly QHR-daǵy jasandy ıntellekt ındýstrııasynyń kólemi 900 mlrd ıýannan (126,7 mlrd AQSh dollary) asty. Bul aldyńǵy jylmen salystyrǵanda 24%-ǵa kóp.

— Qytaıda jasandy ıntellekt salasynda tolyq óndiristik tizbek qalyptasty. Ol bazalyq ınfraqurylymdy, model arhıtektýrasyn jáne salalyq qoldanbalardy qamtıdy. Ótken jyly osy segmentterdiń tabysy tıisinshe 54%, 18% jáne 13%-ǵa ósti, — dep atap ótti akademııada.

Jyldam ósim ıntellektýaldy jabdyqtarda da baıqalady. Bul sanatqa JI negizindegi smartfondar men kompıýterler, sondaı-aq jelilik baılanys fýnktsııasy bar aqyldy kólik quraldary kiredi.

QHR bıligi tsıfrlyq ekonomıkadan «aqyldy» ekonomıkaǵa jáne ıntellektýaldy qoǵamǵa kóshýdi júıeli túrde júzege asyrýda. Bıyl «JI plıýs» bastamasyn engizý boıynsha usynystar jarııalandy. Ol jasandy ıntellekt ınfraqurylymyn damytýdy jáne JI tehnologııalaryn áleýmettik-ekonomıkalyq salalarǵa jedeldetip engizýdi kózdeıdi.

Buǵan deıin biz Qytaıdyń jasandy ıntellektini damytýda pragmatıkalyq ustanymy bar ekenin, bul týraly Lı Kaı-Fý aıtqanyn habarlaǵanbyz.