Qytaı kompanııalary Qazaqstannyń agroónerkásip keshenine ınvestıtsııa salýǵa qyzyǵýshylyq tanytyp otyr
ASTANA. KAZINFORM — Aýyl sharýashylyǵy vıtse-mınıstri Amanǵalı Berdalın agroónerkásiptik keshendi damytýǵa qyzyǵýshylyq bildirgen qytaılyq ınvestıtsııalyq kompanııalardyń ókilderimen kezdesý ótkizdi. Bul týraly mınıstrliktiń baspasóz qyzmeti málimdedi.
Kezdesýdiń negizgi taqyryptarynyń biri – QHR naryǵynda joǵary suranysqa ıe otandyq jylqy tuqymdaryn eksporttaý máselesi boldy.
– Búgingi kezdesý – mal sharýashylyǵy men jalpy aýyl sharýashylyǵy salasyndaǵy ózara tıimdi yntymaqtastyqty nyǵaıtý jolyndaǵy mańyzdy qadam. Bizdiń jylqy tuqymdarymyzǵa degen qyzyǵýshylyq jańa múmkindikterge jol ashady, – dep atap ótti vıtse-mınıstr.
Taraptar veterınarııalyq baqylaý men karantınge arnalǵan ınfraqurylymdy qurý máselelerine erekshe nazar aýdardy. Qytaılyq ınvestorlar Qazaqstan aýmaǵynda veterınarııalyq zerthana ashý nıetin bildirdi.
Bul ortalyq aýyl sharýashylyǵy janýarlarynyń elder arasyndaǵy qozǵalysy kezinde dıagnostıkany jáne bıologııalyq qaýipsizdikti qamtamasyz etýmen aınalysady. Sonymen qatar, kezdesý barysynda klımattyń ózgerýine baılanysty jáne mal sharýashylyǵy úshin sapaly azyq ratsıonyn qamtamasyz etý qajettigi aıasynda ósimdikterdi jem daıyndaý úshin qarqyndy paıdalanýdyń zamanaýı ádisteri talqylandy.
– Biz Qazaqstandy turaqty aýyl sharýashylyǵyn damytýdaǵy strategııalyq seriktes retinde qarastyramyz. Zerthanalar men jem óndirisine ınvestıtsııa – bul bizdiń ortaq bolashaqqa qosqan úlesimiz, – dedi Qytaı delegatsııasynyń ókili Van Chjıfen.
Mınıstrlik agroónerkásiptik keshendi damytý men eldiń eksporttyq áleýetin arttyrýǵa baǵyttalǵan bastamalardy qoldaýǵa jáne odan ári dıalogqa daıyn ekenin rastady.
Aıta keteıik, agroónerkásip kesheninde quny 3,3 trln teńge bolatyn 677 joba iske asyrylady.