Sapasy tómen astyqty eksporttaý máselesi qashan sheshiledi
QR Aýyl sharýashylyǵy mınıstrligi sapasy tómen astyqty Qytaıǵa ótkizý kelissózine qatysty túsinik berdi, dep habarlaıdy Kazinform.
«Kelissózderdiń nátıjeleri qosymsha habarlanady», - delingen mınıstrliktiń Kazinform agenttigine bergen jaýabynda.
Azyq-túlik kelisimshart korporatsııasynyń málimetinshe, qazir sapasy tómen bıdaıdy ótkizý boıynsha Qytaıdyń úsh kompanııasymen kelissóz jalǵasyp jatyr.
«Degenmen astyq kólemi men onyń baǵasy týraly aıtý áli erterek. 5 jeltoqsannan beri tómen surypty 350 myń tonna ónimdi satyp alýǵa qatysty ótinim qabyldaý júrip jatyr», - dep naqtylady korporatsııa baspasóz qyzmeti.
Atap aıtqanda, 2023 jyldyń basynan beri Azyq-túlik kelisimshart korporatsııasy Qytaıǵa 87 myń tonna 3-synypty bıdaı jetkizdi.
Aýyl sharýashylyǵy mınıstrliginiń aqparatyna qaraǵanda, COFCO Resources SA kompanııasymen 75 myń tonna bıdaı jetkizý boıynsha 2 kelisimshart oryndalǵan. ALASHANKOU JINSHAHE FOUR MANUFACTURING CO., LTD kompanııasymen astyq tasymaldaýshy kólikke 50 myń tonna bıdaıdy tıeý jóninde kelisim jasaldy. Qazir 12 myń tonnasy jóneltildi.
«Qytaı naryǵynda jáne «Dostyq-Alashankoý» shekara ótkelinde astyq baǵasynyń tómendeýine baılanysty bıdaı satyp alý ýaqytsha toqtap tur», - dep atalyp ótken habarlamada.
Budan buryn habarlanǵandaı, Azyq-túlik kelisimshart korporatsııasy qazirgi kezde sapasy tómen astyq pen 5-synypty bıdaıdy satyp alýshylardy belsendi túrde izdestirip jatyr.
Bul rette Qazaqstan astyǵyn satyp alatyn eldermen, ıaǵnı Iran, Qytaı, Ózbekstan, Ázerbaıjan jáne basqa da eldermen, sondaı-aq Qazaqstan naryǵyndaǵy satyp alýshylarmen (qus ári mal ósirýshiler, spırt zaýyttary) kelissóz jalǵasyp jatyr.
2023 jyldyń aıaǵynda Parlament depýtattary Qazaqstanda fermerler sapasy tómen astyqtan shyǵynǵa batýy múmkin ekenin aıtqan edi.
«Naqtyraq aıtsaq, 5,6 mln tonnanyń (synypsyz astyq) 200 myńyn ǵana eksporttaısyzdar. Munyń ózinde Qytaı osy 200 myń tonnany naqty alatyny belsiz jáne bul kólem jalpy problemany sheshpeıtini túsinikti. Al qalǵan 5,4 mln tonnany qaıda jiberemiz? Birinshiden, bul máseleni tez arada sheshpese, tómen sanattaǵy osy astyq kóktep shyǵady nemese kúıip ketedi. Bizdiń esepteýimizshe, bul sapasyz tómen astyqtyń tonnasy 55 myń teńge bolsa, qazir sharýalardyń qoımalarynda 300 mıllıard teńgeniń ónimi jatyr. Al eki aıda ol jaramsyz bolyp qalady. Bul aqshany sharýalarǵa kim qaıtarady», — dedi Májilis depýtaty Serik Egizbaev.
