Qytaı kompanııalary Qazaqstanda «jasyl» jobalarǵa belsendi ınvestıtsııa salyp jatyr — Bas konsýl

ALMATY. KAZINFORM — Qytaı balamaly energııa kózderi salasynda álem boıynsha kóshbasshy. Sondaı-aq Qazaqstandaǵy jasyl energetıka jobalaryn júzege asyrýǵa belsene qatysyp jatyr. Bul týraly Qazaq Invest Forum-2025 forýmynda Qytaıdyń Almatydaǵy bas konsýly Tszıan Veı málim etti.

Ol Qytaı men Qazaqstan áriptestiginiń mańyzdylyǵyn atap ótti.

— Qytaı men Qazaqstan — ortaq taý men ózen arqyly baılanysqan tatý kórshi, bir-birine joǵary deńgeıde senetin senimdi dos, tabysqa birge jetýge kómektesetin seriktester, — dedi Tszıan Veı.

Bas konsýl Qytaı jańartylatyn energııa kózderi salasyna álemdegi eń iri ınvestor ekenin tilge tıek etti. Qazaqstanda jasyl jobalarǵa belsendi qarjy quıyp jatyr. Sońǵy bes jylda Qytaıdyń Qazaqstandaǵy jasyl energııa sektoryndaǵy ınvestıtsııa kólemi 3 mlrd dollardan asty.

Qytaıdyń jetekshi kompanııalary eldegi jasyl energetıka jobalaryna tikeleı qatysyp jatyr.

— Bul forým jasyl damý men ınvestıtsııalar máselelerine arnalǵan. Biz eki el kásiporyndary osy alańdy tájirıbe almasý, jańa ózara múddelerdi anyqtaý jáne jasyl energetıka men tsıfrlyq tehnologııa sııaqty mańyzdy salalarda birlesken jobalardy iske qosý úshin tıimdi paıdalanatynyna úmittenemiz, — dedi Tszıan Veı.

Investıtsııalyq forým aıasynda kapıtaly 10 mlrd dollar bolatyn Kazakh-Asia Investment Fund transulttyq qorynyń iske qosylýy týraly memorandýmǵa qol qoıyldy.
Sonymen qatar, jalpy somasy 224 mlrd teńgeden astam kelisimshart jasaldy.

Osyǵan deıin Qazaqstan Respýblıkasynyń Premer-mınıstri Oljas Bektenov Industrial and Commercial Bank of China basqarma tóraǵasy Lıý Tszıýnmen kezdesken bolatyn. Onda ınvestıtsııalyq yntymaqtastyqty tereńdetý perspektıvalary jáne uzaqmerzimdi qarjylandyrýdy tartý máseleleri talqylady.