Qytaı kompanııalary elimizdiń 3 óńirinde astyq pen júgeri óńdeıtin zaýyttar salady

ASTANA. KAZINFORM — Qytaı kompanııalary elimizdiń úsh óńirinde astyq pen júgerini tereń óńdeıtin zaýyttar salady. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

— Búgingi tańda úsh mańyzdy jobany iske asyrý baǵytynda jumys júrgizilip jatyr. Jobalar astyq pen júgerini tereń óńdeıtin zaýyttar salýdy kózdeıdi. Bul bastamalar elimizdiń agroónerkásiptik keshenin jańǵyrtýǵa, jańa jumys oryndaryn ashýǵa jáne eksporttyq áleýetti arttyrýǵa kómektesedi. Almaty oblysynda astyqty tereń óńdeý zaýytyn salý josparlanyp otyr, — dedi Úkimet basshysy.

Onyń dereginshe, «Shanghai Side Cheng Biotechnology» jáne «CITIC» konsortsıýmy salatyn zaýyttyń óndiris qýaty 1-kezeńde — jylyna 300 myń tonna, 2-kezeńde — jylyna 600 myń tonna, 3-kezeńde jylyna 1 mln tonna bolmaq. Jobanyń quny 1-kezeńde — 170 mln AQSh dollary, 2-kezeńde — 350-450 mln AQSh dollary, 3-kezeńde — 450-550 mln AQSh dollary. Jobanyń jalpy quny 1 mlrd AQSh dollarynan asady. Óndiristiń jalpy kólemi shamamen 2 mln tonnaǵa deıin jetedi. Bolashaqta onyń qýatyn arttyrý josparlanǵan.

— Qytaılyq «Shijixianghe agribusiness Group» kompanııasy Aqmola oblysynda jylyna 1 mln tonna bıdaı óńdeıtin zaýyt salýdy josparlaýda. Jobanyń quny 1,6-1,8 mlrd AQSh dollary shamasynda. Qytaılyq «Fufeng Group» kompanııasy Jambyl oblysynda jylyna 500 myń tonna júgeri óńdeıtin zaýyt salýdy kózdep otyr. Ónerkásiptik park quramynda krahmal men qant zaýyty, amınqyshqyldaryn ashytý zaýyty, kómirmen jumys isteıtin jylý elektr stantsııasy jáne sarqyndy sýlardy tazartý stantsııasy bolady. Joba quny 350 mln AQSh dollary dep baǵalanady. Bul jobanyń áleýetti naryqtary — Eýropalyq odaq, Soltústik Amerıka jáne Taıaý Shyǵys elderi, — dedi Oljas Bektenov.

Buǵan deıin elimiz jańa naryqtarǵa 1,5 mln tonnaǵa deıin astyq eksporttaýdy josparlap otyrǵanyn jazǵan edik.