Qytaı bıznesi Qazaqstanǵa taǵy mıllıardtaǵan ınvestıtsııa salýǵa daıyn
ASTANA. KAZINFORM — Prezıdent Qasym-Jomart Toqaev Hong Kong Sino-Science Oil and Gas kompanııasynyń basshysy In Tsaıvanmen, VNET Group basshysy Chen Shenmen, Shanghai Junhe Atomic Technology basshysy Tıan Tszıashýmen jáne Silk Road Finance Corporation basshysy Lı Shanmen kezdesti.
Kezdesý aıasynda energetıka, tsıfrlandyrý jáne qarjy salalaryndaǵy jobalardy birlese júzege asyrý perspektıvasy talqylandy.
Memleket basshysy eki eldiń jan-jaqty strategııalyq seriktestiginiń mazmunyn tehnologııalyq jáne ónerkásiptik turǵydan baıyta túsý mańyzdy ekenine nazar aýdardy. Prezıdenttiń aıtýynsha, Qytaıdyń jetekshi kompanııalarynyń elimizge kelýi Qazaqstanǵa degen senimniń joǵary ekenin aıǵaqtaıdy.
Qasym-Jomart Toqaev In Tsaıvan men ol basqaryp otyrǵan kompanııaǵa «Qazaqstan — Qytaı» ınvestıtsııalyq forýmyn uıymdastyrýǵa úles qosqany úshin rızashylyǵyn bildirdi. Sondaı-aq Hong Kong Sino-Science Oil and Gas kompanııasy Qazaqstanǵa 3 mıllıard dollardan asa ınvestıtsııa quıyp, munaı-gaz salasyndaǵy negizgi kásiporyndardyń birine aınalǵanyn atap ótti.
Áńgimelesý barysynda VNET Group dırektorlar keńesiniń atqarýshy tóraǵasy Chen Shen Derekterdi óńdeý ortalyqtary alqabyn jáne jasandy ıntellekt ınfraqurylymyn jasaqtaý isine qatysý nıetin jetkizdi.
Prezıdent Qazaqstannyń qytaılyq kompanııalarmen ınvestıtsııa tartý, tehnologııalardy lokalızatsııalaý, birlesken zertteýler júrgizý, talanttardy qoldaý jáne quzyretter ortalyǵyn qurý sekildi basty baǵyttar boıynsha tyǵyz yqpaldastyq ornatýǵa ázir ekenin rastady.
Shanghai Junhe Atomic Technology kompanııasymen tehnologııalyq yntymaqtastyq aıasynda atom energııasyn beıbit maqsatta paıdalaný perspektıvti baǵyt retinde ataldy. Bul rette tabıǵı ýran óńdeý men ıadrolyq otyn óndirýden bastap shaǵyn modýldi reaktorlar ornatýǵa deıingi tolyq óndiristik tizbek qurý asa mańyzdy.
Qytaı kompanııalarynyń basshylary Qazaqstandaǵy ınvestıtsııalyq klımatty jaqsartý qadamdaryna, sondaı-aq elde júrgizilip jatqan irgeli reformalarǵa joǵary baǵa berdi. Olar memlekettik ınstıtýttardy jetildirý sharalaryn eldegi uzaqmerzimdi turaqtylyqtyń nyshany retinde qabyldaıdy.
Qytaı kompanııalarynyń ókilderi dástúrli energetıka sektorymen qatar, el damýyna baǵyttalǵan basqa da salalar men jobalarǵa ınvestıtsııa kólemin ulǵaıtýǵa daıyn ekenin aıtty.
Eske salaıyq, buǵan deıin Memleket basshysy Sunwah Group tóraǵasy Tsaı Gýanshendi qabyldaǵanyn jazǵanbyz.
