Qytaı kóktem merekesin toılap jatyr
ASTANA. KAZINFORM — Qytaı turǵyndary 17 aqpan túni aı kúntizbesi boıynsha jańa jyldyń bastalýyn bildiretin Kóktem merekesin qarsy aldy. Jylqy jylyn merekeleý qurmetine elde toǵyz kúndik demalys bastaldy, dep habarlaıdy Kazinform menshikti tilshisi.
QHR tóraǵasy Sı Tszınpın merekeni resmı túrde bastady. Halyq jınalystarynyń úlken zalynda sóz sóılegen Qytaı basshysy eldegi jáne sheteldegi otandastaryn quttyqtap, kirip kelgen jańa jyldyń erekshe sımvolızmin atap ótti.
Sı Tszınpınniń aıtýynsha, qytaı mádenıetinde jylqy energııany, kúsh pen tózimdilikti beınelep, turaqty progresti bildiredi. Qytaı tóraǵasy qytaı halqyn Jańa jylda joǵary rýhty saqtaýǵa jáne eldi jańǵyrtýǵa senimdi túrde umtylýǵa shaqyrdy.
China Media Group uıymdastyrǵan úlken gala-kontsert Jańa jyl qarsańyndaǵy basty medıa oqıǵa boldy. Shoý 13,5 mlrd-tan astam qaralym jınap, tarıhı rekord ornatty. Sahnada halyqaralyq juldyzdar óner kórsetti. Ańyzǵa aınalǵan Djekı Chanmen birge amerıkalyq Laıonel Rıchı men Djon Ledjend, frantsýz ánshisi Elen Rolles jáne ırlandııalyq Westlife toby óz hıtterin oryndady.
Ǵarysh keńistigin sharlap otyrǵan qytaılyq ǵarysh kemeleri de merekeden tys qalǵan joq. «Shenchjoý-21» ǵarysh kemesiniń ekıpajy stantsııany dástúrli stılde bezendirip, alǵash ret ǵarysh peshinde tort pisirip, beınehabarlama arqyly barsha jurtqa amandyq pen beıbitshilik tiledi.
Dástúr boıynsha, mereke úlken otbasylyq merekeler, otshashýlar jáne jarqyn bezendirýlermen atap ótiledi. Kósheler men úıler qyzyl shamdarmen jáne sáttilik tileıtin «chýnlıan» kallıgrafııalyq shıyrshyq qaǵazdarymen bezendirilgen. El qalalarynda ǵıbadathana jármeńkeleri, shamdar festıvalderi jáne dástúrli arystan men aıdahar bıleri ótip jatyr.
Jańa jyl merekesi sondaı-aq «chýnıýn» — álemdegi eń úlken jyl saıynǵy kóshi-qonmen erekshelendi. Mıllıondaǵan adam merekeniń eń mańyzdy dástúri — otbasylyq kezdesýler úshin týǵan qalalaryna oralady.
Qytaı halqynyń jappaı kóshi-qony kezeńinde Qytaı boıynsha temirjol stantsııalarynda, áýejaılarda jáne poıyzdarda gýmanoıdty robottar jumys isteı bastady. Adam tárizdes robottar joǵary jyldamdyqty poıyz vagondarynan bastap áýejaı termınaldaryna deıin kútpegen jerden qytaılyqtardyń týǵan jerlerine saıahattarynyń bir bóligine aınalyp, dástúrli demalys saparlaryna jarqyn tehnologııalyq áser qosyp otyr.
Osyǵan deıin kóktem merekesine oraı Qytaıda jolaýshylar sany 10,5%-ǵa artatynyn jazǵan bolatynbyz.
Sondaı-aq Qytaıda mıllıondaǵan otbasy merekelik dastarhan basyna jınalyp jatqanda, úsh taıkonavt Jerden 400 shaqyrym bıiktikte kóktem merekesin toılaǵanyn jazdyq.