Qytaı Kóktem merekesi qarsańynda kınoseans sany jóninen rekord ornatty
ASTANA.KAZINFORM – Qytaıda Kóktem merekesine oraı berilgen Qytaıdyń jańa jyly sanalatyn 9 kúndik demalysta kınoteatrlarǵa 120 mln adam baryp, kasalyq túsim 828,6 mıllıon dollarǵa jetti, dep habarlaıdy Kazinform agenttiginiń Beıjińdegi menshikti tilshisi Xinhua-ǵa silteme jasap.
Qytaıdyń Memlekettik kınematografııa basqarmasynyń resmı statıstıkasyna súıensek, merekelik demalys kúnderi kórsetilgen kınoseanstar sany 4 mıllıon 355 myńǵa jetip, ulttyq kınonaryq tarıhyndaǵy jańa rekordty jańartty.
Kassalyq kóshti otandyq «Pegas 3» komedııasy bastap, 424 mıllıon dollar tabys tapty. Jarys taqyrybyn jeńil ıýmormen ushtastyrǵan bul týyndy kórermendi baýrap qana qoımaı, naryqtaǵy básekeni de aıqyn kórsetti. Ekinshi orynǵa 125 mıllıon dollar jınaǵan shpıondyq trıller «Dýyl aldyndaǵy tynyshyq» turaqtasa, úzdik úshtikti shamamen 117 mıllıon dollar nátıjemen «Kúzetshilerdiń semseri: Shólde jel kóterildi» tarıhı ekshni túıindedi. Ár janrdyń óz aýdıtorııasy bar ekenin osy kórsetkishterdiń ózi-aq ańǵartady.
Qytaı óner akademııasynyń professory, kınoındýstrııa sarapshysy Chjı Feına mereke kúnderi kınoteatrǵa barý dástúri ózgermegenin aıtady. Alaıda naryqqa tek dástúr emes, sapa qajet. Kórermen endi jarnamaǵa emes, mazmunǵa senedi.
Onyń pikirinshe, «2026 — Kıno ekonomıkasyn ilgeriletý jyly» baǵdarlamasy aıasynda memlekettik bastamalar men naryqtyq tetikter úılesim tapsa, suranysqa ıe sapaly týyndylardyń quny arta túspek.
Osyǵan deıin Netflix pen Warner Bros-tiń birigýi kınoteatrlarǵa qıyn soǵýy múmkin ekeni týraly jazdyq.