Qytaı qoǵamy Qazaqstandaǵy saıası reformalar nátıjelerine joǵary baǵa beredi
ASTANA. KAZINFORM — Buǵan deıin habarlanǵandaı, Qazaqstan Prezıdenti Qasym-Jomart Toqaev bastamashy bolǵan saıası reformalar men konstıtýtsııalyq ózgerister Qytaı qoǵamynda keńinen talqylanyp jatyr.
Áleýmettik jelilerdegi pikirtalastarmen qatar, qytaılyq blogerler, sarapshylar jáne aqparattyq platformalar bul reformalardyń máni men yqtımal nátıjelerine erekshe nazar aýdaryp, Qazaqstannyń saıası jańǵyrý baǵytyna oń baǵa berip otyr.
Qytaılyq ınternet qoldanýshylarynyń pikirinshe, Qazaqstan júrgizip otyrǵan reformalar memlekettik basqarýdyń jańa kezeńine jol ashady. Máselen, «ıÝeın kelemao» (娱音可乐猫) esimdi bloger óz jazbasynda Qazaqstannyń «bir adamnyń bıligi ústemdik etetin basqarý modelinen birtindep bas tartyp, ınstıtýtsıonaldyq basqarý júıesine kóshýge naqty qadam jasaǵanyn» atap ótken. Onyń pikirinshe, bul — eldiń uzaqmerzimdi turaqty damýyn qamtamasyz etýge baǵyttalǵan strategııalyq sheshim.
Al «Lý shı pın sho» (卢师评说) atty qoldanýshy Qazaqstandaǵy ózgeristerdi «sýperprezıdenttik júıeden bas tartyp, memlekettik basqarýdyń jańa teńgerimdi modeline kóshý» dep baǵalap, mundaı reformalar eldiń saıası júıesin odan ári jetildirýge múmkindik beretinin jazǵan.
Sonymen qatar, «Tsın shı loýlan» (青史楼兰) esimdi bloger Qazaqstannyń bul qadamyn «memlekettik basqarý tıimdiligin arttyrýǵa baǵyttalǵan mańyzdy tarıhı sheshim» retinde sıpattaǵan.
Qytaı ınternet keńistiginde jarııalanǵan pikirlerde bıliktiń ınstıtýtsıonaldyq negizderin nyǵaıtý máselesine erekshe nazar aýdarylady. Mysaly, «Nanhý sıao mıanıan» (南湖小绵羊) atty qoldanýshy «bılik shektelýi, baqylaýda bolýy jáne merzimdik negizde júzege asyrylýy tıis» dep atap ótse, «Baıke fensıan tszıýn» (百科分享菌) esimdi bloger «óz júıesin reformalaýǵa batyly jetetin kóshbasshy — tarıhı tulǵa» degen pikir bildirgen.
Sondaı-aq «Tszıtszı de chýanfan» (积极的船帆) atty qoldanýshy Qazaqstannyń reformalaryn «quqyqtyq jáne órkenıetti memleketke qaraı jasalǵan mańyzdy qadam» dep baǵalasa, «Tszı sý sıao ıýı» (极速小鱼) esimdi ınternet qoldanýshy «memleket múddesin jeke bılikten joǵary qoıý — eldiń bolashaǵyn aıqyndaıtyn mańyzdy faktor» ekenin atap ótken.
Qytaılyq aqparattyq jáne saraptamalyq platformalarda jarııalanǵan materıaldarda Qazaqstannyń dástúrli «sýperprezıdenttik» basqarý modelinen bas tartyp, «kúshti Prezıdent — jaýapty Úkimet — yqpaldy Parlament» qaǵıdatyna negizdelgen jańa basqarý júıesine kóshýi memlekettik basqarý tıimdiligin arttyrýǵa baǵyttalǵany atalyp ótedi. Sarapshylardyń pikirinshe, bul ózgerister memlekettik ınstıtýttardyń rólin kúsheıtip, saıası júıeniń turaqtylyǵyn qamtamasyz etýge múmkindik beredi.
Sonymen qatar, Qytaıdyń jetekshi buqaralyq aqparat quraldary Qazaqstandaǵy saıası jáne ekonomıkalyq reformalarǵa turaqty túrde nazar aýdaryp keledi. Atap aıtqanda, Qytaıdyń «Sınhýa» aqparat agenttigi Qazaqstan Úkimetiniń keńeıtilgen otyrysy týraly habar taratyp, elimizdiń temirjol ınfraqurylymyn damytý arqyly tranzıttik júk tasymaly kólemin jyl sońyna deıin 55 mıllıon tonnaǵa jetkizýdi josparlap otyrǵanyn atap ótti. Materıal «Qazaqstan temirjol ótkizý qabiletin arttyryp, Eýrazııa qurlyǵyndaǵy logıstıkalyq tıimdilikti kúsheıtedi» degen taqyryppen jarııalandy.
Bul aqparatty Qytaı Kommýnıstik partııasynyń resmı basylymy — «Jenmın jıbao» gazetiniń ınternet-nusqasy da jarııalap, derekkóz retinde «Sınhýa» agenttigin kórsetken. Basylym Qazaqstannyń kólik-logıstıkalyq ınfraqurylymyn damytýǵa baǵyttalǵan sharalary eldiń óńirlik jáne halyqaralyq ekonomıkalyq baılanystaryn nyǵaıtýǵa yqpal etetinin atap ótti.
Jalpy alǵanda, Qytaı qoǵamynda Qazaqstandaǵy saıası reformalar memlekettik basqarý júıesin jańǵyrtýǵa baǵyttalǵan tarıhı kezeń retinde qabyldanyp otyr. Qytaılyq ınternet qoldanýshylary men sarapshylardyń basym bóligi bul ózgeristerdi ınstıtýtsıonaldyq turaqtylyqty nyǵaıtýǵa, memlekettik basqarýdyń tıimdiligin arttyrýǵa jáne Qazaqstannyń halyqaralyq arenadaǵy rólin kúsheıtýge baǵyttalǵan mańyzdy strategııalyq qadam retinde baǵalaıdy.
Aıta keteıik, qazir Ata Zańymyzdyń bolashaǵyna arnalǵan «Referendým-2026» atty onlaın-marafon ótip jatyr. Marafon aıasynda 100-ge jýyq sarapshy, zańger, qoǵam belsendisi men memleket qaıratkerleri sóz sóıleıdi.