Qytaı-Qyrǵyzstan-Ózbekstan temirjolynyń qurylysyna Qytaı 2,3 mlrd dollar nesıe bóledi

ASTANA. KAZINFORM – Keshe Qytaı-Qyrǵyzstan-Ózbekstan temirjolynyń qurylysyn qarjylandyrý týraly kelisimge qol qoıyldy, dep habarlaıdy Kazinform menshikti tilshisi.

Qyrǵyz Respýblıkasy Mınıstrler Kabıneti baspasóz qyzmetiniń málimetinshe, kelisim «Qytaı-Qyrǵyzstan-Ózbekstan temirjol kompanııasy» JShS (birlesken jobalyq kompanııa) men quramyna Qytaı damý banki men Eksımbank kiretin Qytaı Halyq Respýblıkasynyń Bankter sındıkaty arasynda jasaldy.

Jobanyń jalpy quny 4,7 mlrd AQSh dollaryn quraıdy, onyń 2,3 mlrd somany Qytaı úsh el qurǵan birlesken jobalyq kompanııaǵa 35 jyldyq nesıe retinde beredi.

Qalǵan 2,3 mlrd AQSh dollar úsh el birlesken jobalyq kompanııanyń jarǵylyq kapıtalyna engiziledi: Qytaı (51%), Qyrǵyzstan (24,5%) jáne Ózbekstan (24,5%).

Temirjol qurylysy jobasy aıasynda jalpy uzyndyǵy 120 shaqyrym bolatyn 50 kópir men 29 týnnel salý qarastyrylǵan. Qyrǵyzstan aýmaǵyndaǵy temir joldyń jalpy uzyndyǵy 304 shaqyrymdy quraıdy.

Buǵan deıin Qytaı-Qyrǵyzstan-Ózbekstan temirjol qurylysy praktıkalyq kezeńge aıaq basqany týraly habarlanǵan bolatyn.

Buǵan deıin Qytaı-Qyrǵyzstan-Ózbekstan temir jolynyń qurylysy praktıkalyq kezeńge ótkenin habarlaǵan bolatynbyz.