Qytaı Qyrǵyzstannyń jańa energııa kózderine 1 mlrd dollarǵa deıin ınvestıtsııa salýǵa daıyn
ASTANA.KAZINFORM - Qyrǵyzstannyń Ulttyq ınvestıtsııalyq agenttigi men China Energy Engineering Investment jańartylatyn energııa salasyndaǵy yntymaqtastyqty jáne eldegi ınvestıtsııalyq jobalardy júzege asyrýdy talqylady, dep habarlaıdy Kazinform agenttiginiń Bishkektegi tilshisi.
Investıtsııalar jónindegi ulttyq agenttiktiń baspasóz qyzmetiniń habarlaýynsha, Qytaı Qyrǵyz Respýblıkasynda jalpy qýaty 700 MVt-qa deıingi elektr stantsııalaryn salýǵa 1 mıllıard dollarǵa deıin ınvestıtsııa salýǵa qyzyǵýshylyq tanytty, onyń ishinde 500 MVt kún energııasy, al 200 MVt jel energııasy bolady.
Agenttik Qyrǵyz Respýblıkasyndaǵy jańartylatyn energııa kózin damytýdy basymdyq retinde qarastyratynyn atap ótti.
- Biz halyqaralyq seriktestermen yntymaqtastyqqa ashyqpyz jáne olardy ınvestıtsııalyq jobalardyń barlyq kezeńderinde qoldaýǵa daıynbyz, - delingen málimdemede.
Kezdesý qorytyndysy boıynsha taraptar yntymaqtastyqtyń naqty salalaryn birlesip damytýǵa jáne ınvestıtsııalyq bastamalardy praktıkalyq deńgeıde qarastyrýǵa kelisti.
Biz buǵan deıin Qazaqstanda quny 2 mlrd dollardan asatyn 7 «jasyl» joba júzege asatynyn habarlaǵan edik.
