Qytaı Qyrǵyzstan úshin vızalyq tártipti jeńildetti
BІShKEK. KAZINFORM — Qyrǵyzstan azamattary 20 tamyzdan bastap Qytaıǵa 10 kúnge deıin vızasyz kire alady, dep habarlaıdy Kazinform agenttiginiń Bishkektegi menshikti tilshisi.
Bul týraly Qyrǵyz Respýblıkasy Prezıdenti Ákimshiligi Syrtqy saıasat bóliminiń meńgerýshisi Saǵynbek Ábdimútálip QHR Memlekettik kóshi-qon basqarmasynyń aqparatyna silteme jasap habarlady.
— Qyrǵyzstan azamattarynyń Qytaıǵa 10 kúnge deıin vızasyz kirýi úshin tek bir ǵana talap bar: Qaıtar joldyń Qyrǵyzstanǵa úshinshi el arqyly ótetinin rastaıtyn áýe bıleti bolýy qajet, — dep túsindirdi Saǵynbek Ábdimútálip.
Budan basqa, Qyrǵyzstan azamattaryna Haınan aralyna 30 kúnge deıin vızasyz kirýge ruqsat etiledi.
Aıta keteıik, Qytaı Qyrǵyzstan azamattary úshin 10 kúndik vızasyz rejımdi birjaqty túrde engizip jatyr. Qytaı azamattarynyń Qyrǵyzstanǵa kirýi úshin burynǵydaı vıza alýy kerek.
Osyǵan deıin AQSh Ortalyq Azııa azamattaryna 15 myń AQSh dollarǵa deıin vızalyq kepil engizgenin habarladyq.
