Qytaı – Qyrǵyzstan - Ózbekstan temirjolynyń qurylysy bastaldy

ASTANA. KAZINFORM – Qytaı – Qyrǵyzstan – Ózbekstan temirjolynyń jobasy týraly úkimetaralyq kelisimge qol qoıylǵanyna jylǵa jýyq ýaqyt ótkende negizgi magıstraldyń qurylysy resmı bastaldy.

Sınhýa agenttiginiń habarlaýynsha, Qytaı–Qyrǵyzstan–Ózbekstan temirjolynyń Qyrǵyzstan aýmaǵyndaǵy negizgi nysandary – Ferǵana, Naryn-1 jáne Kosh-Tóbó týnnelderiniń qurylysy sáýir aıynyń sońǵy kúnderi bastaldy. Bul – atalǵan jobanyń naqty qurylys kezeńine aıaq basqanyn bildiredi.

Atalǵan úsh týnneldiń úsheýi de bir baǵytty, bir jolaqty jáne árqaısysynyń uzyndyǵy 10 shaqyrymnan kem emes. Bul týnnelder Qytaı–Qyrǵyzstan–Ózbekstan temirjolynyń asa mańyzdy strategııalyq bólikteri sanalady. Agenttiktiń jazýynsha, joba bıik taýly, klımaty qatal, seısmıkalyq belsendi, geologııalyq qysymy joǵary, jer bederi kúrdeli, kólik qatynasy qıyn aımaqta júrgizilip jatyr, qurylys jumystarynyń ońaıǵa túspeıtini belgili.

Ótken jyldyń maýsym aıynda Qytaı, Qyrǵyzstan jáne Ózbekstan úkimetteri atalǵan temirjol jobasy boıynsha úkimetaralyq kelisimge qol qoıǵan bolatyn. Sóıtip, 27 jyl boıy keıinge shegerilip kelgen temirjol jobasy shyn máninde júzege asyryla bastaǵan edi.

Lianhe Zaobao basylymynyń jazýynsha, Qytaı–Qyrǵyzstan–Ózbekstan temirjoly Qytaıdyń ShUAR aýmaǵyndaǵy Qashqar qalasynan bastalyp, Torǵat asýy arqyly Qyrǵyzstan jerine ótedi. Ári qaraı Qyrǵyzstannyń shekaralyq Jalalabad qalasy arqyly Ózbekstannyń shyǵysyndaǵy Ándijan qalasyna jetedi.

Atalǵan temirjoldyń jalpy uzyndyǵy – 523 shaqyrym. Bolashaqta temirjol magıstraly Taıaý Shyǵys, Ońtústik Azııa men Eýropa aımaqtaryna deıin uzarýy múmkin. Sarapshylar bul joba Qytaıdyń Ortalyq Azııa elderimen jáne ózge aımaqtarmen yntymaqtastyǵyn tereńdetýde mańyzdy ról atqarady dep sanaıdy.

Ótken jyly Beıjińde Qytaı Halyq Respýblıkasy, Qyrǵyz Respýblıkasy, Ózbekstan Respýblıkasy úkimetteriniń arasynda «Qytaı-Qyrǵyzstan-Ózbekstan» temir jolyn salý jobasy boıynsha kelisimge qol qoıý rásimi ótkenin habarlaǵan edik.