Qytaı-Qyrǵyzstan-Ózbekstan temir jolynyń qurylysy praktıkalyq kezeńge ótti

BІShKEK. KAZINFORM — Qyrǵyz Respýblıkasy Mınıstrler kabıneti tóraǵasynyń orynbasary — Sý resýrstary, aýyl sharýashylyǵy jáne óńdeý ónerkásibi mınıstri Baqyt Torobaev Qytaı memlekettik temir jol korporatsııasy bas dırektorynyń orynbasary Van Lısın bastaǵan delegatsııamen kezdesti, dep habarlaıdy Kazinform menshikti tilshisi. 

— Qytaı-Qyrǵyzstan-Ózbekstan temir jolynyń qurylysy praktıkalyq kezeńge aıaq basty. Tonnelder, ýaqytsha ınfraqurylymdy salý jumystary júrgizilip keledi, negizgi uıymdastyrýshylyq jáne ákimshilik máseleler sheshilip jatyr, — delingen habarlamada.

Mınıstrler kabıneti jobany júzege asyrýǵa jan-jaqty qoldaý kórsetip jatyr. Tıisti memlekettik organdarmen úılestirý keńesteri turaqty túrde ótkizilip turady. Qurylystyń barlyq kezeńderinde ekologııalyq jáne qaýipsizdik normalaryn saqtaýǵa erekshe nazar aýdaryldy.

Qyrǵyzstan Respýblıkasy Mınıstrler kabıneti baspasóz qyzmetiniń málimetinshe, qyrǵyz tarapy qytaılyq áriptesterimen odan ári syndarly yntymaqtastyqqa senim bildirdi. Jobaǵa barlyq qatysýshylardyń ulttyq zańnamany, kásibı etıkany jáne qoǵamdyq tártipti saqtaýynyń mańyzdylyǵy atap ótildi.

Budan basqa, júk tasymalynyń boljamdy kólemin qalyptastyrý, Temirjol mamandaryn daıarlaý akademııasyn ashý, Torýgart, Makmal, Jerge-Tal, Jalal-Abad ekonomıkalyq aımaqtaryn qurý sııaqty negizgi damý baǵyttary talqylandy.

Baqyt Torobaev ınvestıtsııalyq kelisimge sáıkes jobany júzege asyrýda jumys isteıtin qyrǵyz azamattarynyń úlesin arttyrýdy usyndy. Ol sondaı-aq jergilikti jetkizýshilerden taýarlar men qyzmetterdi satyp alýdyń basymdyǵyn atap ótti.

Taraptar jobanyń uzaq merzimdi turaqtylyǵyn qamtamasyz etý úshin aǵymdaǵy kezeńde osy máselelerdi birlesip zertteýdi bastaýǵa kelisti.

Eske sala ketsek, ótken jyly Bishkekte Qytaı-Qyrǵyzstan-Ózbekstan temir jol qurylysyn júrgizetin kompanııa qurylǵanyn jazǵan bolatynbyz.