Qytaı kerqulandy Helanshan qaptalyna qaıta jersindirmek
ASTANA. KAZINFORM – 1 naýryzda Qytaıdyń Nınsıa-Hýeı avtonomııalyq regıonyndaǵy Helanshan ulttyq tabıǵı qoryǵynyń baspasóz keńsesi úsh aılyq beıimdeýden ótken alty kerqulannyń tabıǵatqa jiberilgenin habarlady.
Chinanews agenttiginiń habarlaýynsha, ǵylymda Prjevalskıı jylqysy degen atpen belgili kerqulan –qazirgi kúnde jabaıy jylqynyń jer betinde saqtalǵan jalǵyz túri. Sondyqtan ol naǵyz «relıkttik túr» sanatyna jatady jáne ekojúıede aıryqsha mańyzdy oryn alady.
Tarıhı derekterge sáıkes, ertede túrkishe Qulan taýy atanǵan Helanshan óńirinde dala taǵylary jyrtylyp aırylǵan eken. Alaıda ártúrli sebepke baılanysty óńirde kerqulandar tarpy qalmaı joıylyp ketken.
2024 jyldyń qyrkúıek aıynda mamandar toby Helanshan taýyna arnaıy ekspedıtsııa uıymdastyryp, onyń soltústik qaptalyn kerqulandarǵa anaǵurlym qolaıly dep uıǵarady. Olardyń pikirinshe, bul óńirdiń klımaty men tabıǵaty kerqulandar tirshilik etetin Jońǵar dalasymen qaraılas, sondyqtan janýarlar tez beıimdelip, jersinýge tıis.
Qaıta jersindirý josparyna sáıkes, Helanshan qoryǵyna úsh etapta jalpy 18 kerqulan ákelinedi. Bul shara osy aımaqta jabaıy jylqynyń turaqty popýlıatsııasyn qalyptastyrýǵa baǵyttalǵan. Kerqulannyń alǵashqy úıiri 2024 jyldyń 3 jeltoqsanynda Shyńjańdaǵy Qaramaıly tuıaqty janýarlar qoryǵynan Helanshan qoryǵyndaǵy beıimdeý ortalyǵyna jetkizilgen ári sonda úsh aı boıy jańa ortaǵa úıretilgen.
Basylymnyń jazýynsha, bul joly tabıǵatqa jiberilgen alty kerqulan – bir aıǵyr jáne bes bıe – arnaıy irikteýden ótken, jas ári kúıli.
Aldaǵy bes jylda Eýropadan Qazaqstanǵa 40 Prjevalskıı jylqysy ákelinetinin jazǵan bolatynbyz.