Qytaı Qazaqstannyń kredıttik reıtıngin joǵary baǵalady
ASTANA. KAZINFORM — Qytaıdyń ulttyq reıtıngtik agenttigi China Lianhe Credit Rating Co., Ltd Qazaqstan Respýblıkasyna «Turaqty» boljamymen «AAA» eń joǵary táýelsiz kredıttik reıtıngin berdi, dep habarlaıdy UEM baspasóz qyzmeti.
— Qazaqstan Respýblıkasynyń memlekettik boryshtyq quraldaryn QHR naryǵyna ornalastyrý sheńberinde Qytaı ulttyq reıtıngtik agenttigi China Lianhe Credit Rating Co., Ltd elimizge jáne memlekettik oblıgatsııalarǵa «AAA» uzaq merzimdi kredıttik reıtıngin berdi. Agenttik eldiń makroekonomıkalyq saıasaty ornyqty ekonomıkalyq ósýdi qamtamasyz etýge, ınflıatsııany tómendetýge jáne ekonomıkany ártaraptandyrýǵa baǵyttalǵanyn atap ótti, — delingen habarlamada.
Qazaqstan progressıvti reformalardy dáıekti túrde iske asyryp keledi, sonyń arqasynda memlekettik basqarý tıimdiligi artyp jatyr.
Negizgi baǵyttardyń ishinde jańa ınvestıtsııalyq saıasat, memlekettiń ekonomıkaǵa qatysýyn qysqartý, ShOB-ty nyǵaıtý, sondaı-aq agroónerkásiptik keshen men ınfraqurylymdy damytý atap ótildi.
Analıtıkter de memlekettik boryshtyń salystyrmaly túrde tómen deńgeıine jáne syrtqy boryshqa qyzmet kórsetýdiń joǵary qabilettiligine basa nazar aýdarady.
Aıta keteıik, «AAA» reıtıngi eldiń óziniń qarjylyq mindettemelerin oryndaý qabilettiligi men qolaısyz syrtqy ekonomıkalyq jaǵdaılarǵa joǵary turaqtylyǵyn kórsetedi.
Buǵan deıin Qazaqstan álemdik gastronomııalyq reıtıngter kartasyna engenin jazǵanbyz.
