Qytaı Qazaqstannan ónim ımportyn arttyrmaq
ASTANA. KAZINFORM – 2024 jylǵy 15-17 mamyrda Qazaqstan jaǵynyń shaqyrýymen Qytaı Halyq Respýblıkasy Memlekettik keńesi Premeriniń orynbasary Lıý Gochjýnnyń elimizge sapary ótedi.
«Sapardyń negizgi maqsaty – úkimetaralyq baılanystardy nyǵaıtý, sondaı-aq ekijaqty saýda-ekonomıkalyq yntymaqtastyqtyń aǵymdaǵy jaı-kúıi men odan ári damý perspektıvalaryn talqylaý. Sapar aıasynda QR Úkimetiniń basshylyǵymen jáne Qazaqstannyń birqatar óńiriniń basshylarymen ekijaqty kezdesýler ótkizý josparlanǵan», - dedi Syrtqy ister mınıstrliginiń resmı ókili Aıbek Smadııarov mınıstrlikte ótken aptalyq baspasóz máslıhatynda.
Kelissózder barysynda aýyl sharýashylyǵy salasyndaǵy yntymaqtastyqty keńeıtý taqyryby qozǵalady.
«Atap aıtqanda, qazaqstandyq ónimniń eksportyn ulǵaıtýǵa jáne agroónerkásiptik keshen salasyndaǵy birlesken jobalardy iske asyrýǵa erekshe nazar aýdarylady», - dedi resmı ókil.
