Qytaı Qazaqstannan 20 myń tonna shoshqa etin ımporttaýǵa nıetti
ASTANA. KAZINFORM - Shanhaı yntymaqtastyq uıymyna múshe memleketter basshylary keńesiniń 24-shi otyrysy aıasynda Qytaı et qaýymdastyǵynyń ókilderi Soltústik Qazaqstan oblysyndaǵy «EMC Agro» ónerkásip kesheninde boldy, dep habarlaıdy QR Saýda jáne ıntegratsııa mınıstrligi.
Qonaqtarǵa mal soıýdan bastap odan ári ishki naryqqa shyǵarý úshin ólshep-oraýǵa deıingi barlyq óńdeý tsıkli kórsetildi. Búkil protsess avtomattandyrylǵan jáne halyqaralyq sanıtarlyq-epıdemııalyq talaptarǵa sáıkes keledi. Sapany baqylaýdy táýlik boıy nemis analızatorlarymen jabdyqtalǵan zerthana qamtamasyz etedi. Daıyn ónim arnaıy muzdatqysh tsehta saqtalady.
Kásiporynnyń jumysymen tanysqannan soń, taraptar yntymaqtastyq perspektıvalaryn talqylady. Qytaı et qaýymdastyǵy jylyna 20 myń tonna shoshqa etin ımporttaýǵa qyzyǵýshylyq tanytty.
Óz kezeginde, «EMC Agro» kompanııasynyń ónerkásiptik kesheni Qytaıǵa shyǵarylatyn ónimniń 60% -ǵa jýyǵyn jetkizýge daıyn.
«Qazaqstan - múmkindikterge toly el. Búginde Qytaı et qaýymdastyǵyna kiretin kompanııalardyń biri jergilikti kásiporynnan shoshqa etin satyp alýdy josparlap otyr. Áńgime jylyna 20 myń tonna týraly bolyp otyr. Biraq biz qoı men sıyr etine de múddelimiz. Sondaı-aq qazaqstandyqtarǵa mal sharýashylyǵyn damytýda jáne iri jáne usaq mal etin Qytaıǵa eksporttaýda kómek kórsetý úshin óz tájirıbelerimen bólisýge daıynbyz», - dep atap ótti Qytaı et qaýymdastyǵynyń sıyr etin ımporttaýshylar jáne eksporttaýshylar klýbynyń prezıdenti Ma Gýanshen.
«Qytaılyq bıznes-qoǵamdastyq ókilderi birlesken perspektıvaly jobalardy iske asyrýǵa úlken qyzyǵýshylyq tanytyp, qazaqstandyq seriktestermen tabysty yntymaqtastyqqa úmitti. Qytaıdyń talaptary joǵary ekenin túsiný kerek. Jetkizý kólemi turaqty, shıkizat qaýipsiz bolýy tıis. Bizdiń etimiz joǵary sapaly, biz óz ónimimizge kúmán keltirmeımiz, jemisti yntymaqtastyqqa daıynbyz. Kórshi naryq biz úshin mańyzdy», - dedi óz kezeginde «EMS Agro» kompanııasynyń basshysy Erjan Eleýbaev.
Aıta ketý kerek, Qazaqstannyń aýyl sharýashylyǵy ónerkásibi memleket basshysynyń erekshe baqylaýynda. Qasym-Jomart Toqaev fermerlerdiń aldyna azyq-túlik qaýipsizdigimen qatar zaýyttardyń óndiristik bazasyn keńeıtý, qazaqstandyqtardy sapaly ónimmen, al ınvestorlardy úzdiksiz eksportpen qamtamasyz etý mindetin qoıdy.
Qytaı et qaýymdastyǵy QHR-daǵy et óndirý jáne taratý boıynsha eń iri ulttyq birlestik bolyp tabylady jáne oǵan 1300-ge jýyq múshe kiredi.
Al, «EMC Agro» – Qazaqstandaǵy iri et óńdeıtin kásiporyndardyń biri. Kásiporyn túpki tutynýshy úshin joǵary sapaly, ekologııalyq taza ónim óndirý men jetkizýge jáne elimizdiń et naryǵyndaǵy suranysty tolyq qamtamasyz etýge baǵyttalǵan. Et kombınatynyń óndiristik qýaty jylyna 20 myń tonna et jáne táýligine 30 tonna daıyn ónim shyǵarýǵa múmkindik beredi.
