Qytaı qazaqstandyq et ónimderin kirgizýge ruqsat berýge daıyn
Saýda jáne ıntegratsııa mınıstri Arman Shaqqalıev Beıjińde QHR Bas keden basqarmasy basshysynyń orynbasary Sýn ıÝınınmen kelissóz ótkizdi, dep habarlaıdy Kazinform.
Taraptar mal jáne ósimdik sharýashylyǵy ónimderiniń eksporttyq taýarlarynyń nomenklatýrasyn keńeıtý máselelerin talqylady.
Arman Shaqqalıev óz sózinde birqatar taýarlar boıynsha qytaılyq kompanııalar men QHR-ǵa eksporttaýdy josparlap otyrǵan bizdiń kásipkerler tarapynan joǵary suranys bar ekenin atap ótti.
«Biz Qazaqstanda birneshe ret bolǵan kóptegen qytaılyq kompanııalarmen kezdesýler ótkizdik, Olar sıyr eti, qoı eti, taýyq jáne sýbónimder satyp alýǵa daıyn. Investıtsııalyq yntymaqtastyq boıynsha kelissózder júrgizilýde, iri qytaılyq kompanııalar qytaı naryǵyna odan ári eksporttaý maqsatynda qazaqstannyń et óndirisi úshin orasan zor qarajat salýǵa daıyn. Biraq qajetti jaǵdaı jasaý úshin qolda bar shekteýlerdi alyp tastap, et ónimderin eksporttaýdy qaıta bastaý qajet», — dedi Arman Shaqqalıev.
Aıta ketý kerek, QHR Bas keden basqarmasy aýsyl jáne qus tumaýy aýrýlaryn baqylaý boıynsha Qazaqstannyń veterınarlyq qyzmetin baǵalaý úshin elge kelýge daıyn.
«Biz sondaı-aq salqyndatylǵan et ónimderiniń, termııalyq óńdelgen et ónimderiniń, qustyń eti men sýbónimderiniń, taǵamdyq jumyrtqalardyń, jylqy etiniń jáne basqa da taýar túrleriniń eksportyna qoıylatyn talaptardy kelisý boıynsha jumysty bastaýǵa daıynbyz», — dedi kezdesý barysynda Qazaqstan Saýda mınıstrliginiń basshysy.
Kelissóz barysynda ózara saýdadaǵy kedergilerdi joıý jóninde kelisim jasaldy.
QHR Bas keden basqarmasy Qazaqstannan termııalyq óńdelgen et ónimderin jetkizýge qoıylǵan shekteýdi alyp tastaýǵa daıyn ekenin bildirdi.
QHR naryǵynda qazaqstandyq túıe súti úlken suranysqa ıe. Qytaı tutynýshysy bul ónimniń dámi men sapasyn biledi.
Qazaqstannyń bıe sútin eksporttaý boıynsha úlken áleýeti bar.
Alaıda, QHR-da osy ónimdi naryqqa jetkizý úshin tıisti ulttyq standart ázirleý qajet, bul týraly kelissózder barysynda da aıtyldy.
Eksporttyń taǵy bir mańyzdy baǵyty — ósimdik sharýashylyǵy ónimderi. Qazaqstan Qytaıǵa súıektijemis daqyldaryn (shabdaly, órik, shıe) jiberýge daıyn.
Burshaq jáne jasymyq boıynsha áleýetti eksporttaýshylardyń tizimi jasaldy.
«Biz suly úlpegi, qyzylsha tsellıýlozasy men kartop, jarma, kúnbaǵys tuqymynyń shroty, maqsary boıynsha eksportty arttyrýǵa daıynbyz», — dedi Arman Shaqqalıev.
Kezdesý qorytyndysy boıynsha bıyl qytaı delegatsııasy keletin boldy. Ol úshin jaqyn arada sapar baǵdarlamasy kelisiledi.
Sapar qorytyndysy boıynsha Qytaı tarapy shekteýdi alyp tastap, mal sharýashylyǵy ónimderiniń eksportyn talqylaýǵa kóshýge daıyn.
Sonymen qatar, qytaı tarapy termııalyq óńdelgen sıyr etine, qoı etine jáne qus etine qoıylatyn veterınarlyq talaptardy kelisý boıynsha jumysty qatar bastaýǵa kelisedi.
