Qytaı qazaqstandyq aýyl sharýashylyǵy ónimderiniń eksportyn arttyrýǵa múddeli

ASTANA. KAZINFORM - QR Aýyl sharýashylyǵy mınıstri Aıdarbek Saparov QHR-nyń Qazaqstandaǵy Tótenshe jáne Ókiletti elshisi Chjan Sıaomen kezdesti.

QR Aýyl sharýashylyǵy mınıstrliginiń habarlaýynsha, taraptar qos memleket  arasyndaǵy yntymaqtastyǵyn odan ári damytý múmkindikterin talqylady.

Mınıstr aýyl sharýashylyǵy salasyndaǵy yntymaqtastyq Qazaqstan-Qytaı qarym-qatynastarynyń mańyzdy quramdas bóligi ekenin, bul elder arasyndaǵy aýyl sharýashylyǵy ónimderiniń saýdasyna oń serpin beretinin atap ótti. 2023 jyly AÓK ónimderiniń taýar aınalymy 1,6 esege ósip, 1,3 mlrd dollardan asty. Sonymen qatar, sońǵy jyldary Qytaı halqynyń organıkalyq jáne ekologııalyq taza qazaqstandyq aýyl sharýashylyǵy ónimderin tutynýǵa suranysy artqan. Ótken jyly aspan asty eline aýyl sharýashylyǵy ónimderiniń eksporty 2 esege ósip, 1,01 mlrd dollardy qurady.

«Qytaı naryǵy da qazaqstandyq astyqty eksporttaýǵa úlken qyzyǵýshylyq tanytyp otyr. Biz jyl saıynǵy jetkizý kólemin 2 mln tonnaǵa deıin arttyrý múmkindigimiz bar», - dedi Aıdarbek Saparov.

Aýyl sharýashylyǵy mınıstri Chjan Sıaodan bıyl taýarlardyń jańa túrlerin eksporttaý jónindegi ekijaqty qujatqa kelisý men qol qoıýdy jedeldetýge járdem kórsetýdi surady. Bul – salqyndatylǵan et, qus sharýashylyǵy ónimderi, qosymsha ónimder, qyzylsha jáne kartop ónimderi.

Sondaı-aq, Aıdarbek Saparov Qytaıǵa eksporttaý úshin mal sharýashylyǵy ónimderin óndiretin jańa qazaqstandyq kásiporyndardy akkredıtteý máselesin sheshýde de elshiniń kómegi qajet ekendigin jetkizdi.

Aıdarbek Saparov Qytaı Úkimetine aýyl sharýashylyǵy ónimderiniń sapasyn tekserýge arnalǵan zerthanalyq jabdyqtardy berýge keliskeni úshin alǵysyn bildirdi. Qazaqstan Qytaı tarapymen birlesip, ony elge tezirek jetkizý maqsatynda jabdyqty berý tetikterin talqylaýǵa daıyn.

Sondaı-aq, AShM basshysy qytaılyq kásipkerlerdi aýyl sharýashylyǵy ónimderi men azyq-túlik ónimderin óndirý jáne tereń óńdeý, onyń ishinde óndiristik kooperatsııa qaǵıdattary boıynsha birlesken jobalar uıymdastyrýǵa shaqyrdy.

Mınıstrdiń aıtýynsha, Qazaqstan Úkimeti birlesken jumys úshin jaǵdaı jasaıtyn bolady.

Óz kezeginde Chjan Sıao mınıstrge Qytaı Qazaqstannan et, astyq jáne ózge de aýyl sharýashylyǵy ónimderin úzdiksiz ımporttaýdy qamtamasyz etý boıynsha yntymaqtastyqqa daıyn ekenin aıtty. Qytaı naryǵynyń kólemin eskere otyryp, Qazaqstannan keletin ımportty ulǵaıtýdyń múmkindigi zor ekenin jetkizdi.

Budan bólek, QHR AÓK salasyndaǵy yntymaqtastyq jónindegi kishi komıtetti qurý jónindegi jumysty baqylaýǵa alýdy usynady. Platforma turaqty negizde birlesken saparlardy uıymdastyrýǵa jáne aýyl sharýashylyǵy salasynyń ózekti máseleleri boıynsha QR jáne QHR ýákiletti vedomstvolary arasynda turaqty tikeleı baılanystar ornatýǵa múmkindik beredi. Jarǵynyń jobasy ázirlendi jáne Qytaı tarapy oǵan mamyr aıynda Qazaqstanda ótetin ShYU-ǵa qatysýshy elder mınıstrleriniń keńesinde qol qoıýdy usyndy. Chjan Sıao sonymen qatar SQO-da jańa tehnologııalarmen jabdyqtalǵan zamanaýı et kombınatyn salý týraly usynys jasady.

Kezdesý sońynda qos tarap kelissózder Qazaqstan men Qytaı arasyndaǵy aýyl sharýashylyǵy salasyndaǵy yntymaqtastyqty odan ári nyǵaıtýǵa septigin tıgizetinine senim bildirdi.