Qytaı Qazaqstandy referendýmnyń sátti ótýimen quttyqtady
ASTANA. KAZINFORM – Qytaı tarapy Qazaqstandaǵy jańa Konstıtýtsııa boıynsha referendýmnyń tabysty ótýimen quttyqtaqdy. Bul týraly dúısenbide Qytaı Syrtqy ister mınıstrliginiń resmı ókili Lın Tszıan málimdedi, dep habarlaıdy Kazinform agenttiginiń Beıjińdegi menshikti tilshisi.
Dıplomat atap ótkendeı, Qytaı dostas kórshi jáne uzaq merzimdi jan-jaqty strategııalyq seriktes retinde Qazaqstannyń uzaq merzimdi beıbitshilik, turaqtylyq jáne áleýmettik órkendeýdi qamtamasyz etýge baǵyttalǵan kúsh-jigerin joǵary baǵalaıdy.
- Biz Prezıdent Qasym-Jomart Toqaevtyń basshylyǵymen Qazaqstan memlekettik qurylysta jańa jáne odan da tańǵajaıyp tabystarǵa jetetinine, al «Ádil Qazaqstandy» qurý boıynsha ambıtsııaly maqsaty sátti júzege asyrylatynyna senimdimiz, - dep atap ótti ol.
Resmı ókildiń aıtýynsha, Qytaı tarapy ekijaqty qarym-qatynastardy damytýǵa únemi úlken mán berip, eki memleket basshysy qol jetkizgen mańyzdy kelisimderdi dáıekti túrde júzege asyrý úshin Qazaqstan tarapymen birlesip jumys isteýge daıyn.
- Biz jan-jaqty, ózara tıimdi yntymaqtastyqty tereńdetýge jáne Qytaı-Qazaqstan qarym-qatynastaryn sapalyq turǵydan jańa deńgeıge kóterýge bel baılap otyrmyz, - dep túıindedi Lın Tszıan.
Aıta keteıik, 15 naýryzda Qazaqstanda jańa Ata Zańnyń jobasy boıynsha jalpyulttyq referendým ótti.
Bıyl 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalandy.
Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
Respýblıkalyq referendýmda berilgen bıýlletende «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal qoıyldy.
Ortalyq referendým komıssııasynyń málimetine qaraǵanda, Qazaqstanda daýys berý quqyǵy bar azamattardyń 73 paıyzdan astamy óz tańdaýyn jasady.
Birinshi exit poll nátıjesine qaraǵanda, referendýmda halyqtyń 86,7%-y jańa Konstıtýtsııany qoldady.
Osyǵan deıin ShYU mıssııasy Qazaqstandaǵy referendýmda jastar belsendi bolǵanyn atap ótti.