Qytaı Qazaqstandaǵy jańartylatyn energetıka jobalaryna qyzyǵýshylyq tanytyp otyr — mınıstr

ASTANA. KAZINFORM — Sońǵy 30 jyl ishinde qytaılyq kompanııalar Qazaqstannyń otyn-energetıka keshenin damytýǵa belsendi qatysyp keledi. Qytaımen seriktestik týraly tolyǵyraq Energetıka mınıstri Erlan Aqkenjenov aıtyp berdi. 

— Qazaqstannyń Qytaı jáne Ortalyq Azııa elderimen yntymaqtastyǵy jańa kezeńge qadam basyp otyr. Qazaqstan men Qytaı qarym-qatynasynyń «altyn otyz jyldyǵynyń» bastalǵanyn aıtyp otyrmyz. Osy ýaqyt ishinde strategııalyq senim, naqty jobalar men ornyqty ózara is-qımyl tetigi qalyptasty. Energetıka salasy — óńirlik kooperatsııanyń negizgi baǵyty, ónerkásipti damytý, ınvestıtsııa tartý jáne turaqty ósimdi qamtamasyz etýdiń irgeli elementi, — dedi Erlan Aqkenjenov elordada ótken «Qytaı — Ortalyq Azııa» iskerlik keńesiniń ekinshi otyrysynda.

Mınıstrdiń málimdeýinshe, energetıka salasyndaǵy Qytaımen áriptestik uzaq merzimdi jáne ózara tıimdi yntymaqtastyqtyń jarqyn úlgisi.

— Sońǵy 30 jyldan astam ýaqyt boıy qytaılyq kompanııalar Qazaqstannyń otyn-energetıka keshenin damytýǵa belsendi qatysyp keledi. Qol qoıylǵan úkimetaralyq kelisimder aıasynda jańartylǵan energııa kózderi salasyndaǵy aýqymdy jobalardy júzege asyrý úshin turaqty negiz qalyptasqan. Qytaılyq seriktester tarapynan kún jáne jel energııasy jobalaryn birlesip iske asyrýǵa qyzyǵýshylyq artyp otyr. Sonymen qatar jańartylǵan energııa kózderi men jasyl energetıka salasyna arnalǵan komponentterdi shyǵaratyn ındýstrııalyq baza damyp keledi. Baza ishki naryqty qamtýmen qatar, óńirlik eksportqa da baǵyttalǵan, — dep tolyqtyrdy vedomstvo basshysy.

Búgin Astanada ótken «Qytaı — Ortalyq Azııa» iskerlik keńesiniń ekinshi otyrysy aıasynda jalpy quny 17 mıllıard AQSh dollarynan asatyn 35-ten astam memorandýmǵa qol qoıyldy.

Buǵan deıin habarlaǵanymyzdaı Túrkistan oblysynda qytaılyq ınvestor toqyma kombınatyn salyp jatyr.