Qytaı Qarýly kúshterdegi saıası tártip pen oqytýdy kúsheıtpek
ASTANA. KAZINFORM – Qytaı Halyq Respýblıkasynyń tóraǵasy Sı Tszınpın Qytaıdyń Qarýly kúshterinde saıası tártipti nyǵaıtyp, kadrlardy daıarlaý júıesin jetildirýge shaqyrdy, dep habarlaıdy Sınhýa.
Sı Tszınpın, sondaı-aq Qytaı Kommýnıstik partııasy Ortalyq komıtetiniń Bas hatshysy jáne Ortalyq áskerı keńestiń tóraǵasy retinde Beıjińdegi Qytaı halyq-azattyq armııasynyń Ulttyq qorǵanys ýnıversıteti bazasynda ótken Qytaı halyq-azattyq armııasynyń joǵary býyn kadrlaryna arnalǵan oqý kýrsynyń ashylý rásiminde sóz sóıledi.
Qytaı kóshbasshysy 2027 jyly atap ótiletin armııanyń qurylǵanyna 100 jyl tolýyn jańa saıası deńgeıde qarsy alýǵa shaqyrdy.
Onyń aıtýynsha, partııa men armııanyń birligi ıdealdar men senimge negizdeledi. Osyǵan baılanysty Sı Tszınpın partııa jáne ásker qatarynda qyzmet etý marksızmge shynaıy senim men partııa isine adaldyqty talap etetinin atap ótti.
Sı Tszınpınniń aıtýynsha, joǵary laýazymdy kadrlar ishki partııalyq tártipti qatań saqtaýda jáne shyndyqty aıtýda úlgi bolýy tıis.
«Kez kelgen jeke paıdakúnemdik pen sybaılas jemqorlyq áreketteri partııanyń tabıǵaty men negizgi maqsattaryna qaıshy keledi», – dedi ol.
Sonymen qatar ol joǵary býyn basshylary partııa men armııanyń úzdik dástúrlerin jańǵyrtyp, sheneýniktik menmendikten arylyp, revolıýtsııalyq jaýyngerdiń shynaıy bolmysyna oralýy qajet ekenin atap ótti.
Qytaı basshysy zań aldynda bári teń ekenin, zańdar men normatıvtik aktilerdi saqtaý eshqandaı erekshelikke jol bermeıtinin eske saldy.
Sı Tszınpınniń aıtýynsha, jańa tarıhı jaǵdaıda buryn-sońdy bolmaǵan birlikke súıene otyryp, halyq armııasy qarýly kúshterdi nyǵaıtý men damytý jolynda jańa kezeńge qadam basady.
Aıta keteıik, Qytaı sybaılas jemqorlyqqa qarsy jahandyq naýqandy qaıta bastady.
