Qytaı kanadalyq taýarlarǵa qosymsha baj salyǵyn engizdi
ASTANA. KAZINFORM - 8 naýryz kúni Qytaı úkimeti Kanadadan ákelinetin birqatar ónimderge qosymsha baj salyǵy engiziletinin jarııalady.
Qytaı Qarjy mınıstrliginiń resmı saıtynda jarııalanǵan habarlamaǵa súıensek, «Kedendik tarıf týraly QHR zańy» men halyqaralyq quqyqtyń negizgi qaǵıdalaryna sáıkes, Qytaı tarapy Kanadadan ákelinetin keıbir taýarlarǵa 20 naýryzdan bastap qosymsha baj salyǵyn engizý týraly sheshim qabyldady.
Jarııalanǵan tizimge sáıkes: kanadalyq qyshabas maıyna, kúnjaraǵa jáne asburshaqqa 100% mólsherinde baj salyǵy salynady; omar, tońazytylǵan tańqy shaıan men basqa da teńiz ónimderine, sondaı-aq shoshqa etiniń barlyq túrine 25% baj salyǵy engiziledi.
Atalǵan ónimderge qosymsha baj salyǵy qoldanystaǵy kedendik tarıfter negizinde engiziledi.
Sonymen qatar, qoldanystaǵy kedendik jáne salyqtyq jeńildikter ózgerissiz qalady, alaıda qosymsha engizilgen baj salyǵyna jeńildik qarastyrylmaıdy.
Habarlamada Kanada úkimetiniń 2024 qazan aıynda Qytaıdan ımporttalatyn elektrmobılderge 100%; bolat pen alıýmınıı ónimderine 25% baj salyǵyn engizý týraly sheshim qabyldaǵany tilge alynǵan. Habarlamada aıtylýynsha, Dúnıejúzilik saýda uıymynyń erejelerin óreskel buzǵan bul sharalar protektsıonızmniń aıqyn kórinisi retinde Qytaıdyń múddesine óte aýyr zııan keltirgen.
Buǵan deıin Qytaı Syrtqy ister mınıstri AQSh-ty tarıfter men saýda soǵysy saıasatyn qaıta qaraýǵa shaqyrǵan bolatyn.