Qytaı kádimgi smartfon arqyly alǵashqy spýtnıktik qońyraý jasady
ASTANA. KAZINFORM — Qytaıdyń spýtnıktik ınternet qyzmetin usynatyn kompanııasy mańyzdy tehnologııalyq jetistikke qol jetkizip, eshqandaı qosymsha ózgeris engizilmegen kádimgi kommertsııalyq smartfon arqyly eldegi alǵashqy spýtnıktik qońyraýdy sátti oryndady, dep habarlaıdy Sınhýa.
Shtab-páteri Shanhaıda ornalasqan Yuanxin Satellite kompanııasy juma kúni bul Qytaıdaǵy osyndaı alǵashqy synaq ekenin málimdedi. Synaq barysynda baılanys jelisi tolyqtaı turaqty jumys istep, daýys sapasy joǵary deńgeıde saqtalǵan.
Osy aıdyń basynda Qytaı «Chjýtsıýe-2E» zymyran-tasyǵyshyn ushyryp, onyń kómegimen eki spýtnıkti orbıtaǵa shyǵardy. Olardyń qatarynda Spacesail DTC 01 tájirıbelik spýtnıgi de bar. Bul apparat tikeleı spýtnıktik baılanys qyzmetterin kórsetý jáne ǵaryshtyq ári jerústi baılanys jelilerin biriktirý tehnologııalaryn synaqtan ótkizýge arnalǵan. Joba spýtnıktik baılanysty 5G jáne 6G jelilerimen tereń yqpaldastyrýǵa tehnıkalyq negiz qalyptastyrýdy kózdeıdi.
Jańa tehnologııanyń ereksheligi — qarapaıym kommertsııalyq smartfondarǵa eshqandaı apparattyq nemese baǵdarlamalyq ózgeris engizýdi qajet etpeıdi. Dalalyq synaq kezinde baılanys sıgnalynyń deńgeıi tolyq qýatta bolǵan, al daýys sapasy zamanaýı 5G jelilerindegi baılanys deńgeıimen shamalas nátıje kórsetken.
Kompanııanyń málimetinshe, spýtnıktik tehnologııanyń qoldanystaǵy mobıldi jelilermen joǵary úılesimdiligi ǵaryshtyq jáne jerústi baılanys ınfraqurylymdaryn biriktirýge keń múmkindik beredi.
2026 jylǵy 5 maýsymdaǵy jaǵdaı boıynsha Spacesail Constellation spýtnıktik toptamasynyń quramyndaǵy apparattar sany 200-ge jetti.
Buǵan deıin Qytaı ınternet tehnologııalaryn synaýǵa arnalǵan jańa spýtnık ushyrǵanyn jazǵanbyz.
