Qytaı Izraılden Gazadaǵy áskerı operatsııany dereý toqtatýdy talap etti

ASTANA. KAZINFORM – Qytaı bıligi Izraılden onsyz da qıyn gýmanıtarlyq daǵdarysty odan saıyn ýshyqtyrmaý úshin Gazadaǵy áskerı operatsııany toqtatýdy talap etti. Bul týraly QHR SІM resmı ókili Lın Tszıan málim etti, dep habarlaıdy reseılik TASS.

- Biz Izraıldi halyqaralyq qaýymdastyqtyń únine qulaq asyp, shuǵyl túrde Gazadaǵy áskerı operatsııany toqtatýdy jáne búgingiden de qıyn jaǵdaıdaǵy gýmanıtarlyq daǵdarys týyndamaý úshin az ýaqyt ishinde atysty barlyq baǵyt boıynsha jáne turaqty toqtatýdy talap etemiz,-dedi ol brıfıng barysynda.

Ol sonymen qatar Qytaıdyń barlyq múddeli taraptardyń óńirde beıbitshilik pen turaqtylyqtyń saqtalýyna basym baǵyt berip, ún qosady degen úmitte ekenin jetkizdi.

- Qytaı Izraıldiń Gazadaǵy áskerı operatsııasymen baılanysty jaǵdaıdyń ýshyǵýyna tabandy túrde qarsy. Biz azamattarǵa shyǵyn keltirip, halyqaralyq quqyqty buzatyn barlyq áreketterdi aıyptaımyz jáne kúnnen kúnge shıelenisip bara jatqan jaǵdaıǵa alańdaýshylyq bildiremiz, - dep tolyqtyrdy resmı ókil.

Osyǵan deıin Izraıl premer-mınıstri Bınıamın Netanıahý áskerdiń Gazaǵa aýqymdy qurlyqtyq shabýyl bastaǵanyn rastady. Onyń maqsaty – Gaza qalasyn tolyq baqylaýǵa alyp, onda qalǵan palestınalyq HAMAS radıkaldy qozǵalysynyń múshelerin tolyq joıý.

Qatardyń Al Jazeera telearnasynyń habarlaýynsha, seısenbiniń túninde ǵana Izraıl áýe kúshteriniń bombalaýy saldarynan Gaza men oǵan qarasty aýdandarda 40-tan astam palestınalyq qaza bolyp, ondaǵan adam jaraqat alǵan.