Qytaı Izraıldegi azamattaryn elden ketýge shaqyrdy
BEIJІŃ. KAZINFORM — Qytaı úkimeti Izraıl men Iran arasyndaǵy shıelenistiń kúsheıýine baılanysty óz azamattaryna Izraıl aýmaǵynan ketýdi usyndy, dep jazdy Anadoly.
Tıisti eskertý Qytaıdyń Tel-Avıvtegi elshiligi tarapynan WeChat resmı paraqshasynda jarııalandy.
— Izraıl men Iran arasyndaǵy qaqtyǵys ýshyǵyp barady. Azamattyq ınfraqurylymǵa zııan kelip jatyr, beıbit turǵyndar arasynda qaza tapqandar sany artyp keledi, jalpy qaýipsizdik jaǵdaıy nashar, — delingen habarlamada.
Izraıl áýe keńistiginiń jabylýyna baılanysty Qytaı elshiligi óz azamattaryna elden Iordanııamen shekaralas jer ústi ótkelderi arqyly shyǵýǵa keńes berdi.
Izraıl men Iran arasyndaǵy shıelenis
13 maýsymda Izraıl Irannyń ıadrolyq nysandaryna jáne eldiń túrli qalalaryndaǵy joǵary áskerı basshylyqtyń ornalasqan jerine aýqymdy áýe soqqylaryn bastady.
Nátıjesinde Iran Qarýly kúshteri Bas shtabynyń bastyǵy, Islam revolıýtsııasy saqshylary korpýsynyń qolbasshysy, birneshe joǵary laýazymdy ofıtser jáne ıadrolyq zertteýler salasyndaǵy toǵyz ırandyq maman qaza tapty. Beıbit turǵyndar arasyndaǵy qurbandar sany 224 adamǵa jetti.
Jaýap retinde Iran ballıstıkalyq zymyrandar arqyly Izraıl aýmaǵyna soqqy jasady. Resmı málimetter boıynsha, bul shabýyldan 24 adam qaza taýyp, 500-den astam adam jaraqat alǵan.
Túrkııa bastaǵan birneshe el Izraıldiń áreketterin qatań aıyptady.